小傻的個人專頁

好耐冇寫過食評，趁住呢幾日假期便將自己所食的 POST 上來吧。行入 The One ~ 發現原來佢在地庫係有兩層的，分別是 LG1 和 LG2。平時在 The One 好少會落去，但今日被我在地庫第 1 層見到呢間特色既蛋糕店。在傳單上，她寫上蛋糕是來自德國的。其實，我對德國蛋糕認識不深... 對於我來說，好吃便行了。本人好怕 d 甜到漏既蛋糕，而友善的店員為此亦推介了其中兩款蛋糕給我: 1. 紅草莓蛋糕, 2. 蘋果批肚子餓到極點既小傻，第一件事便立刻吃紅草莓蛋糕。佢上面有一層脆粒 (我唔知佢個名... 好似人地 apple crumble 上的 crumble) ~ 上層既 texture 比較硬，但下面的蛋糕較為鬆軟。而且，佢既紅草莓亦都好足料，食落去啖啖肉。味道亦不會太甜，好香草莓味。因為佢唔溜，所以好快便被我 K.O. 了。在店員推介下 (買滿 $50 有 $10 OFF)，我就外賣了另一個蘋果批。呢個我真係極度讚好... 首先，佢面層既蘋果係好足料，約有 10 片左右，以 $38 呢個價位真係好抵。佢既蘋果批係屬酸酸甜甜的一類，在配上較甜的提子乾，真係好得。紅草莓蛋糕是軟身的，而呢個蘋果批就較濕潤... 那種酸酸甜甜既蘋果汁滲進蛋糕層內，食落去感覺好清新。在香港，好少會食到呢種味道既蛋糕。必再 encore ﹗如果你都唔係好鍾意食太甜既蛋糕，真係不容錯過。當然，好甜者既.. 亦都會有其他選擇的。最後又忍唔住再追加個泡芙。個人黎講，佢細細粒，一口食一粒都唔錯。皮簿, 又唔會太硬。而 d 雪糕亦不錯。最後就影埋佢地既宣傳單張，依家買滿 $50 有 $10 off。呢個價位係值的，買完件 Cake 去樓上睇戲都唔錯。聽說佢地都有在團購網站做 offer。不過，我諗到呢個食評出街後，個 offer 應該完結了。見到 'The One' 既地庫人流實在不多，或者唔係好多人知有呢一層既存在。不過，我係 LG1 真係見到有幾多唔錯既食肆。希望日後會多 D 人識去。…查看更多

富豪呢個舖位，長做長有.. 平均一年換一手。不過，上回君悅皇一年唔夠就「壯士斷臂」，因為佢 D 野貴得黎又唔好食... 難怪冇人幫襯。今次到富豪客棧頂手。起初真係唔睇好佢，見佢 D 餐牌唔係好吸引。不過，身為附近既居民，有時懶得去太遠... 始終都會試下。估唔到又有驚喜喎。第一次食既係芙蓉蛋飯，好香口，但又唔會好油膩，好味的。之後再食埋佢 D 早餐，份量足，同埋幾好味。小炒都試過，京都肉排一流，睇得出個廚房部係好有誠意去做。依家有空就會去幫襯下，真係希望呢個舖位內會有間長駐既餐廳... …查看更多

雖然佢 d 湯底係名符其實既味精水... 但總是食過番尋味。本身唔食豬大腸既我，係度一定會要一份，皆因佢真係醃得好好味。而魚蛋亦都非常彈牙... 冬菇蘿蔔都炆得好入味，仲有雞翼尖也是不能錯過的。怪不得... 這見經常會見到人龍吧﹗…查看更多

網上有不少好評，趁假期有空檔便去看看。店舖較少，位置幾難搵，可能要花時間找找。點內似 CAFE 格局，所有食物即叫即製，如果以焗蠔來說，十多分鐘上菜都算會理。肚子不太餓，只點了兩隻珍寶蠔。兩隻蠔都好肥美... 但相比之下, 左邊係芝士菠菜焗珍寶較香同埋濃味，而右邊既煙肉焗蠔則欠缺特色。會去試埋其他食物，但不是本人急切期待的一種。…查看更多

前幾日去左食家. 韓食一番地食晚飯，今次叫左韓式燴粉絲、石頭鍋飯 (雞肉) 和吞拿魚紫菜卷。粉絲依然都好食的，但好似縮水了。石頭鍋飯熱辣辣，可隨意加麻油和辣醬，冬天食最岩。不過，份量都係少左... 今次要左吞拿魚紫菜卷，都唔錯，但覺得傳統果隻好食 d。店內依然人頭湧湧，到左八點都仲係好多人等。勁﹗不過，我真係希望佢地唔好再縮水... 感覺差了點。 …查看更多

在尖沙咀上堂，去左就近既米線舖試試。佢既 ORDER FORM 值得一讚，好多 Columns... 可以減低左落錯單既情況。佢既米線亦都好彈牙，熱辣辣，唔錯。湯底要左少少辣同普通酸。少少辣真係比唔辣刺激一點而已.. 但對於小妹來說是剛剛好。不過，個湯底真係太鹹... 太濃味了。以往我會用 spoon 盛起米線，然後夾埋少少湯一起放入口的... 但呢度真係唔敢。即使我就咁夾起米線黎食，都已經咸到想死。個湯底雖然都幾惹味，但小妹真係受唔到咁咸。餸菜要左蘿蔔和冬菇.. 其實兩種配料都夠清甜的，但好可惜... 個湯底太濃味，搞到佢地都變得好鹹。兩樣料 $30, 加飲品 $6.. 大大碗米線 $36 埋單，算唔錯。不過... 請問可否加多一行.. 少少鹹呢？…查看更多

在第一城中心，三十五座對面... 新開了兩所食肆，分別是麵軒和雲貴川食府。麵軒為台式連鎖店，而本人則對雲貴川稍為有興趣。兩個人，今天試了一碗過橋米線 (2人份量) 和小食 -- 皮蛋拌豆腐。皮蛋拌豆腐係辣的，辣得黎帶麻果種。佢唔會「拿喉」，麻辣味都算幾香。至於過橋米線... 都幾大碗。要清湯，即使有數舊肥肥的腩肉，但個湯底依然好清甜。佢每樣配料都有少少，但覺得佢青菜太多，酸菜太少。而佢既米線屬較硬身的一種。因為佢夠大碗，所以食到好飽。除了米線和小食外，佢亦都有碟頭飯和餃子。不過，可能因為新開，我地下午二時左右去到... 所有餃子均已 sold out。見有幾枱客叫炸饅頭，不過都炸得幾燶，個 look 好似茶葉蛋咁... 埋單每人 $32.5 。呢間食店質數都唔錯，可說是附近居民的新選擇。…查看更多

記得約 8 年前.. 果時乜都唔識。第一次跟朋友去尖沙咀食 fat angelo's 時，比佢碟意粉 (夠大份) 和麵包吸引住。仲記得點菜時，朋友千叮萬囑 「四個人點兩樣野好喇...」.因為驚我地唔知頭唔知路，點得太多野食。 不過 8 年後，fat angelo's 多左不少分店... 除此之外，主打大大碟既美國菜食肆相繼出現。多了競爭，現在較容易找到類似風格既食物。再加上物價上漲，唔係加價就縮水，所以再沒有 8 年前的那種「震撼」。點解會再黎 fat angelo's 呢？始終都係為左佢既麵包藍同埋沙律，只要叫 pasta 或者main course 便有得送，仲要係無限 refill 添。所以，兩個人... 如果唔係好大食的話，叫一個意粉 / main course + 一個小食應該都會飽。(唔飽咪 refill 囉 ~ 哈哈... 又開始計埋 d婆仔數了﹗) 論麵包，呢間分店係唔差，但我覺得佢唔夠熱... 質素最好既麵包，始終都係荃灣分店。另外既沙律都係送既。蕃茄好新鮮，菜好清甜，洋蔥更加係又爽又甜。配埋上面既 garlic 同沙律汁，真係好開胃。小食要左個芝士焗西蘭花: 芝士味濃，個白汁都好味的。當然佢唔夠肉丸特別... 但今天始終都係想食多點菜。pasta 選了忌廉汁三文魚闊條麵 (regular size)... 覺得佢好似縮左水。沒有了當年那種「震撼」的感覺。(可能係以前少機會去呢類餐廳卦 ~) 不過，三文魚都足料。忌廉汁份量岩岩好，可以包得酒 d 闊條麵得黎.. 又唔會太膩。另外加左杯凍檸茶，又係可以 refill 囉。埋單找數，每個人頭約 $130。以佢格局黎講，算 ok。依家 fat angelo's 做了任飲任食... 一至四 $298 一位，五至日 $328 位。但小妹覺得，除非你係好多人，而當中又有好多大食既人去... 而你又好想飲下 cocktail ，wine .. 又你又咁岩打算坐成晚，飲住野傾偈的便可以諗。否則，我都唔知用咩方法先可以令自己個胃容納到價值 $298 的東西。…查看更多

上次同媽子食完大中華後，心裏一直在想着要再來。事隔三個月，終於翻兜左大中華。佢同新派既素食店唔同，新派素食店賣既.. 係 d 餸同原先既肉類有幾相似。呢度都有新派既食物，如素刺身，但本人覺得呢度就係... 主力「研究」如何用常吃的蔬菜來造出特色既素食，菜式都幾有心思。首先講一講，呢度係收茶芥的，每人 10 元正。下圖為大豆芽，叫做 ok 啦。上次食左二人餐，飽到七彩，所以今日散叫。以下為小食，香芒卷。佢類似米紙卷，裏面以西芹加生果為主，配上沙律醬，上面有粒小杏仁。唔單止睇得，仲好好食。菜式叫左開運聚寶鴨 (個名可能同菜單上有少少出入，請見諒) ~ 今次又比到我地驚喜。睇個菜牌，跟本唔知佢係會用白汁去焗蔬菜，包括薯仔、蕃茄、青菜等... 呢 d 係不會在傳統既素食店內找到的。睇佢個樣好似有點溜，但食落去係 ok.. 因為 d 蔬菜出水，所以 d 汁會變得稀左。個汁就係接近西式既做法，白汁內加了香草，好香。在家煮食時又多了新靈感。另外點了福建炒飯。睇相都可以見到佢係好足料... 炒飯底好香但唔油，色香味俱全。是晚奉送甜品，為黑糯米。椰汁味較香，但佢唔會好甜，為此餐作了一個圓滿的結尾。雖然在菜牌上的菜式選擇不多，但每道菜均是花了不少心思。此店跳出了傳統素食店的框框，但同時亦不會像新派素食店般，盲目追求與傳統肉類相似... 最後型造了「獨當一面」的風格。食客可申請做會員，入會費 $20 。永久 9 折，即時生效... 如果預左會再去既話，申請埋會有着數，哈﹗…查看更多

年尾想食碗美味湯麵... 網上找呀找 ~ 見到士林台灣麵便試試。舖位難找，兜了好幾個圈才找到。招牌不起眼，但可以認住是在春和樓隔離。春節期間要加一，但依然坐無虛席，等左十分鐘先有位座。上圖為香酥雞扒飯。雞扒足料，可以夠兩個人 share。而咬落去亦鬆化... 雞汁「蜂湧而至」但仍不會感到油膩。這兒的雞扒不會好似大雞大咁，勁落味粉 ~ 值得一讚。另外都叫左個香酥排骨，較乾身，同樣不太油膩但略嫌太乾身。但這兒的牛肉麵卻令小妹失望。第一，湯底唔夠熱; 第二，麵質不夠彈牙.. 而牛肉質數亦只是不過不失。叫任何食物 + $10 便可配飲品，質數還可。不過，個人建議加珍珠，因為佢地 d 珍珠都幾彈牙﹗鍾意炸物既可以一試，但不必特登拜訪。…查看更多

難得可以忙裏偷閒，梗係去食個 tea 先啦。今次揀左間茶記黎試下 ~ 就是在 charlie brown cafe 隔離的綠島餐廳。叫左兩個茶餐，$30 樓下有交易，尖咀黎講算幾抵。第一個係豬扒飽。唔好期望佢係大大塊豬扒定係超香脆麵包... 但食落佢都唔錯，豬扒都幾 juicy，個飽就可以再烘得熱少少，脆少少。另外有個炸雞批同薯仔沙律。佢個炸雞批... 又幾好食，雞批入味，而且唔係油淋淋。配上以薯仔和水果為主的沙律，都幾夾。廿零蚊包埋杯野飲，好抵﹗餐飲要左一杯凍檸水和凍檸茶，少甜... 但黎到時依然係好甜。埋單 $57... 真係幾抵食。當然，你唔好期望佢真係好食到流晒口水啦... …查看更多

Applegreen... 相信呢個名字對大家黎講真係唔算陌生，但老實講，開左咁耐，小妹都係第一次去食。等我又睇下佢因乜野咁出名。首先，叫左半粉脆杏仁雞絲沙律: 一上菜時，我地都「嘩﹗」左一聲，好多菜，足料到呢﹗d 菜好爽口同埋好 fresh，同埋脆杏仁又令到個沙律更香口... 再加上個沙律醬好夠酸，好開胃。我地係咁食，係咁食囉 ~ 另外叫左個肉醬意粉加蜆: 一個意粉要近 $100 其實唔算平。肉醬意粉都算幾好，意粉有點硬 (定係我唔識食，呢個叫 Al dente 是也？)，個汁同肉醬都足夠。不過，個蜆冇乜驚喜，不加也罷。又叫左兩杯野飲，分別係青蘋果梳打同埋草莓梳打。如果喜愛甜味的，可點草莓味 (不過本人覺得似藥水) ~ 青蘋果梳打就偏向酸的，證明佢少用糖漿囉﹗試完之後比個總結佢，就係... 佢既沙律真係一流，不過意粉就唔算突出。至於小食，就有機會再試。講真，我會想再去，因為佢 d 沙律好清新，同埋好特別﹗…查看更多

呢篇係寫番 1 月尾時的食評。食左佢唔少款壽司，係呢度唔逐樣寫，只係總括咁寫下先: 三文魚、油甘魚都幾新鮮的，較突出的是洋風劍魚腩壽司... 估唔到劍魚腩配西式沙律醬係咁好食的。至於另外一樣較突出的是杏仁片甜蝦壽司，爽口既甜蝦配上香脆的杏仁片，都算一個幾好既配搭，可以一試。此店亦有不少創作壽司，但除左上面果兩隻外，其他不算好特別。個人覺得.. 要返傳統的壽司還好。至於刺身就一般，份量較少，又唔算好新鮮，唔抵食。蟹籽沙律就好好味: 佢主要係用青瓜絲同蟹柳絲，蟹籽既份量足，而青瓜亦好 fresh 好爽口。忍唔住口食左好多。要左炸蠔，隻蠔雖然唔算大粒，但佢係漲卜卜的。食落佢，d 汁湧晒出黎，good ﹗叫左 17-18 樣野，四個人，每人夾返 $130 左右... 又有個位比我地傾下偈，都算唔錯的。不過，到了午夜壽司時段.. 佢會開始同你埋單囉﹗…查看更多

今天收工時打去叫外賣自取... 十幾分鐘後去到第一城就有得拎。叫左個一人餐，包括菠蘿火腿簿餅同埋一碗粟米湯。($23)粟米湯多粟米粒，較稀的，但個人覺得咁樣唔會好滯。而個 PIZZA 係較簿身同較硬，CRISPY 的，芝士份量適中，而芝士下面就有意粉醬... 都幾好食。加 $8 有雞寶，一客四件... 但我覺得佢油左 D，同埋脆漿太厚，不叫也罷。以大眾化價錢吃到中上級數的食物，好滿足。會再幫襯佢既意粉同埋 PIZZA。…查看更多

原味餅本身 8 元變 10 元，烟肉同肉鬆亦都由 4 元增加至 5 元。食左兩三次，幾香脆... 但偏油。我就較喜歡粟米沙律或者就咁加一片芝士 (因為手抓餅既熱力令芝士半溶)不過，只限間唔中食一次吧﹗多食就好熱氣了。…查看更多