NgaLunChan的個人專頁

見咁多好評，先至入去試依間餐廳，極度懷疑全部都係打手，認真唔洗試，食到成肚氣。啱啱入餐廳，本身餐廳得一台客，我哋係第二台，本身職員安排咗嘅座位有啲大風，所以轉咗去另一張枱，佢嘅態度都有啲差，不過諗住坐低咗就算啦。開始點嘢食，我哋18:55到達點餐，有五份一嘅食物都已經售罄，所以選擇都唔多。食物質素認真麻麻，啲刺身唔新鮮，壽司好細粒，性價比好低。串燒先激氣，全部預製菜，擺明係超級市場買嚟嘅急凍貨再燒，全部都超級鹹，係鹹到要洗腎嘅級別，冇一樣嘢好食㗎!我明白小店人手少出菜慢，但真係慢到太過分，7點前已經落哂單，7點45分先上野食。唔明白廚房點解可以唔分清楚邊一張枱落單先而上菜，遲我哋半個鐘入嚟嘅人都有嘢食先過我哋，真係等都等到飽，成肚氣。其實，元朗有好多其他好食嘅舖頭，就算平日提早book都未必有位。但係依間星期六晚市淨係做得一轉，真係要好好反省吓自己啲食物質素，其實冇心做，不如執咗佢，留返間鋪俾其他有心做餐飲嘅人開。性價比極低，唔會有下次，未食過嘅唔需要去浪費quota加時間。…查看更多

新開嘅米線店，見到門口個姨姨推介雞湯米線就諗住試吓啦。雞湯個湯頭比較淡，冇乜味，但係都比起落重味精嘅好嘅。雞肉方面，份量比較較少，嗌咗兩份，九成都係雞胸，都幾失望，完全對唔住個價錢。佢每碗都另外一件其他部位嘅，不過好多碎骨，斬雞師傅手勢好差，喺啲湯度有碎骨食起上嚟爭啲哽親。另外，雞湯下面係有個爐點住嘅，其實一直熱住都幾好，不過唔知佢用咗啲咩燃料，啲燃料熏到我隻眼紅晒係咁標眼水….咁大個女真係第一次😂😂😂😂明明張單寫$195，埋單嘅時候個女人同我講收2百幾，最後計多次係佢哋計錯數，跟返單嘅價錢先啱，搞到對餐廳嘅感覺更加差總括而言，性價比好低，又未去到難食嘅，不過依個份量加質素就唔會再食下一次囉…查看更多

見到試業期間門口有人排隊，梗係去試吓，不過我哋等咗3分鐘左右就已經有位。牛肉嘅份量都足夠，老實講都算多，但係非常咸，係無牛味得咸味。白蘿蔔同紅蘿蔔都唔夠淋，應該話未煮透。湯底同麵都一般，唯一加分位係有少少配菜，啲配菜仲好食過個麵。黑糖珍珠奶茶有得少甜，但茶味唔夠，要另外加12蚊。價錢唔平，質素一般，啲牛係咸到食唔到，好失望。朋友嘅牛肉飯都係食左少少就食唔到，牛肉咸到咁驚食完要洗腎，個湯都係得咸味，廚師真係好浪費食物。最後，好少餐廳lunch time要加一，覺得好唔值，無下次。…查看更多

其實今次已經係第二次嚟食，都係叫返我嘅最愛砂鍋竹笙雞湯米(A1)，個湯底一如既往都係好飲的。不過唔知係咪我黑仔，唔明點解去邊度食雞湯米永遠都係會比雞翼尖同埋雞胸俾我，不過都唔緊要嘅，因為人哋本身係有得加$10可以指定要雞髀，但係我自己冇加。我老公就叫咗蟲草花花膠雞湯米，佢啲雞係雞髀位，所以我之後同佢交換晒啲雞嚟食，哈哈。兩個米線得一樣配菜係唔同，但係都飲得出兩個米線嘅湯底係有分別嘅，都幾加分。啲雞係滑嘅，唔係煲湯嘅底料，同埋雞嘅份量係合理嘅。美中不足嘅係，雞翼嘅位置其實係撞瘀咗，而且都好明顯，但係舖頭都照比客人，覺得依個位置就有啲唔貼心，因為瘀咗嘅雞根本就唔應該拎嚟食，所以係扣返啲分。環境方便，舖頭係小店，而且間隔係好窄嘅，都坐得幾逼夾。服務方面，舖頭係用QR code落單嘅，所以其實都冇乜服務可言。但係本人今日咁啱用晒袋入面嘅紙巾，問個女店員有冇紙巾，佢就一句話冇，我都明白舖頭要提供紙巾會增加咗成本，但係如果見到顧客真係有需要嘅話，俾張紙巾我又唔覺得好過分，又或者可以賣一包包嘅紙巾，方便顧客會好好多。其實舖頭開係一啲咁偏僻嘅位置，都好靠做熟客生意，而且定價都唔係平，如果係服務嘅位置可以貼心啲嘅話，我諗應該都會有多啲回頭客。整體嚟講都算唔錯嘅不過服務就真係有待改善…查看更多

呢排要去灣仔做嘢，因為一大班同事，見依間餐廳又大枱，所以揀咗依間餐廳食飯，點知仲晒伏。一坐低，隻手撳咗落張凳就feel到成隻手都係粉狀嘅嘢，唔知係上一手客人倒瀉糖定係倒瀉啲咩，個感覺都已經好差，不過對茶餐廳本身都冇乜期望，如果啲嘢食正常就冇問題啦。點知……餐廳展示食物啲圖片係幾好睇嘅，但係食物完全唔係嗰回事。我哋一枱六人，五個人都俾佢餐牌上面嘅滑蛋叉燒飯吸引咗，個個都嗌咗滑蛋叉燒飯。點知嚟到係豬頸肉，餐廳如果冇叉燒嘅話應該明確咁樣同返客人講，而唔係偷龍轉鳳，完全係被詐騙的感覺，非常之差！如果整得好食都算，重點係豬頸肉都整得咁難食，啲豬頸肉完全冇燒過冇烤過，個味道好奇怪，唔係蜜汁叉燒夠醬汁，係甜得來好難食嗰種，難食到唔知點樣形容，如果60幾蚊嚟講，真係有大把選擇，起碼唔係食啲咁難食嘅嘢…..另外，佢個所謂全日套餐係唔包嘢飲嘅，如果唔係附近冇乜餐廳多位嘅話，我諗呢間嘢都唔會有人食佢個飯係難食到可以令人食完之後影響全日的心情，大家自行考慮吓要唔要去食…查看更多

最近開始涼涼哋想食吓雞湯米線，特登走去食朋友推薦嘅呢間餐廳，唔使等位直接入咗去，安排咗我哋坐喺攤位附近嘅枱。等餐嘅時間都幾長，本身諗住應該係即叫即做，所以都唔緊要，但係坐咗喺度等咗10幾分鐘，比同一個職員撞我張凳撞咗10幾次，係冇可能發現嘅。真係撞到抆咗已經好嬲，雖然最後肯俾我哋掉位，但係唔好意思都冇一句真係令我心情好差。我叫咗個雞湯翅米線，個米線湯底係不錯的，食得出係冇味精嘅，啲米線腍咗少少，但係都唔緊要。翅個size細得可憐，每一片都好似塊指甲咁細。輪到啲雞就真係出晒事，啲雞翼份量好少，比起元朗臭河隔籬嗰間可能得一半，都算！我嗰碗米線全部都係一啲下欄位，係雞翼尖同埋雞胸，冇一個位置係滑㗎！啲雞啲質感真係好差，好似啲煲湯底料咁，完全唔值得依個價錢…..我老公就叫咗個花雕雞，藥膳湯底，個湯底味道都係OK嘅冇問題，但係啲雞都係下欄位，都係雞翼尖，叫咗兩個餐全部都係比雞翼尖！究竟發生咩事？依間嘢真係冇下次，呢個價錢真係唔算平，俾啲垃圾人哋食真係過分，奉勸大家真係唔洗試，服務差態度差好差，完全冇可能有下一次！…查看更多

呢間嘢喺香港都少有名氣，今日約咗朋友去沙田食飯，決定試一下。等位本身都等咗大半個鐘，諗住咁多人食應該會唔錯。上菜速度係快嘅，賣相都非常之好，但係食物味道極差！每樣餸菜都係非常之鹹，完全掩蓋咗本身食材嘅味道。炸蝦餅同埋雞肉串燒都還好，只係偏鹹少少，但係其他餸菜完全過鹹。炒通菜係第一個度嘅餸，食咗一啖之後嚇到我哋五個都呆咗，諗住可能依個菜失手啫，之後嗰啲應該冇事嘅….點知其他餸都出晒事！個黃咖喱珍寶蟹肉配蒜蓉包，啲咖喱鹹到完全掩蓋晒蟹嘅味道，蒜蓉包有鹹，咖喱汁極咸，食到人懷疑人生。除咗個芒果糯米飯係正常之外，其他餸完全唔合格，食咁多次泰國菜，真係第一次連蔬菜都可以食唔晒，真係太難入口，唔明真係好懷疑點解會有咁多好評！絕對唔會再去第二次嘅餐廳！未去過嘅都唔建議大家去，覺得食完呢餐飯之後要去洗腎…查看更多

難得見到元朗有喇沙店，即刻想試吓，點知非常失望。試咗佢嘅軟殼蟹喇沙，同埋豬頸肉喇沙，軟殼蟹味道正常，但係份量偏小，好細隻，豬頸肉肉好似白烚完揼落去咁，都算。個湯底先係最出事，個湯係甜口湯底，湯架稀一啲都唔掛湯，而且食完之後個口非常口乾，一定係落咗勁多味精。另外，仲追加咗兩款小食，分別係金菇肥牛卷同埋雞，金菇肥牛卷味道正常，但係個香酥雞真係好厚粉，啲粉同雞嘅比例應該係二比一，係粉仲多過啲雞兩倍！好硬又乾，配嘅甜酸醬仲要得兩滴，點兩件雞已經冇晒，俾得咁少，不如唔好俾！真係好難食，好疑惑，點解咁難食都可以開餐廳？求其喺超級市場買個喇沙麵煮都好食過佢，真係食到好嬲！無下次！…查看更多

係香港食過最難食嘅泰國菜，無一樣野係好食嘅！首先，叫左黃咖喱雞配薄餅，薄餅一早上咗，咖喱10分鐘後先上，當咖喱到咗嘅時候薄餅已經硬過石頭。咖喱味道似茶餐廳港式咖喱，啲雪藏雞，完全唔入味，得雪味。馬拉盞炒肥牛通菜，好咸，又食唔到馬拉盞，啲菜又老。海鮮冬陰功湯個味道還可以，但係用雪藏海鮮，已經雪到爛，扣哂分。豬手都算大碟，但個味又咸又甜，好奇怪。豬肉生菜包，炒得唔香，賣相又差，但味道係接受到嘅。炸蝦餅、炒金邊粉、火車炒飯，味道中規中矩，得依幾樣屋企人係食得多少少，其他係食幾啖就無人再夾。唔知係多打手定廚房佬今日心情唔好，成餐飯食完係唔開心，好難無食過啲咁難食嘅野。請都唔會再返黎食。…查看更多

見依間舖嘅中午嘅啊媽家姐評價唔錯，而且價錢算平，就諗住試試佢。可能因為係lunch time，就算我地入座時無乜客，啲員工都好似忙咁，基本上係無服務可言。首先，係茶碗蒸蛋，正常發揮，普通無特別。之後到前菜三點，一見睇哂，無技術嘅嘢就咁放岀黎，又係普通野，開始feel到伏。刺生5點，係失望，職員對啲刺生唔熟悉，介紹嘅完先發現隻碟倒轉左放，姐係講講哂，再重新講。最後都唔會知佢邊次講嘅先啱。睇都覺得乾，同食唔到鮮味。壽司都係普通，未食過咁差嘅Omakase，價錢係算平，但依個價錢，真係食千兩都好食食過佢☺️無下次😇😇😇…查看更多

依間想試好耐嘅cafe，網上好評如潮，話係全香港最好食嘅tiramisu。所以特登揀平日去試，下午3點去到，前面有5個人排緊㨃入去。好彩舖頭都算大，等咗5分鐘就入到去，不過天氣實在太熱，等一陣已經流晒汗。因為其他食物都唔吸引，所以淨係叫左個tiramisu，同兩杯咖啡。tiramisu好味但蛋糕唔夠濕，依個價錢係值嘅。 Latte 就一般，正常發揮唔係特別吸引。唔使排隊嘅話都會嚟食，如果要排隊嘅話就不了。…查看更多

星期日晚上去，Book定位就唔使等啦。我哋一行四人，坐喺2樓嘅房間入邊，可以喺寧靜嘅環境下用膳。本身預留左條魚同埋龍蝦，其他嘢都係去到舖頭先再點。條魚首先會係刺身上，食完之後又正嘅地方同埋魚骨會拎去煮魚湯。刺身味道都幾鮮，個湯清清地但係都好飲。龍蝦刺身夾雜着新鮮嘅海膽，一啖食落去非常驚喜，呢個係必須點嘅！個龍蝦食完之後可以整粥。龍蝦粥都非常之鮮味，本身已經食到好飽，但最後都可以食晒成碗粥。另外再叫咗近江牛同埋葡萄豬，味道都幾特別，可以試。其他串燒就正常發揮，不過食住串燒飲住生啤真係好享受！…查看更多

差唔多每個月都會食一至兩次，通常都係外賣，但今次質素真係差好遠，如果幫襯都係揀返堂食好啲。麻辣牛肉麵個味同之前無乜分別嘅，不過佢嘅牛肉同埋牛筋就真係食到我眼都突埋。啲牛肉好瘦，瘦到咬完係有渣，唔想呑落肚；牛筋之前會有2至3舊，今次就得一舊。94蚊一碗麵完全唔應該係呢個質素，食到好嬲，呢個質素最多$40都真係比多佢！其實外賣叫春水堂，好大程度上係因為佢個杯鐵觀音珍珠奶茶，不過連飲筒都唔記得比，真係好失望!!!!!!!!要人點樣唔飲筒飲珍珠奶茶!!!!!…查看更多

星期六，搵間餐廳同班fd chill，見間餐廳嘅評價好似唔錯就去試吓。因為而家只限四人一枱食飯，入到去餐廳都好好有分枱，不過之後食食吓隔離枱就坐晒埋一齊，原本有四人一張枱，分開3張枱，變到12個人一張枱，但係餐廳都冇理。一開始就食咗一打生蠔加白酒，$200黎講質素算唔錯。之後就嚟咗雞串同燒魷魚，雞串味道唔錯嘅，但係燒魷魚果汁就太鹹。再食咗個蟹膏配多士，個多士都幾冇誠意，唔脆，仲係林嘅。個蟹膏醬就真係無蟹膏味，反而有一大陣嘅XO醬味，搞到好油又好鹹。個蟹膏炒飯，都係冇乜蟹膏味，得XO醬嘅味，價錢黎講就真係唔多抵食啦！食食吓飯，啲員工仲會推架餐車出嚟收野，講真間餐廳有唔忙，成個場得兩班客人，又唔多客，好心唔好咁核突。總括嚟講，可以一試，但係唔會再試。…查看更多

去深水埗做完嘢，諗住搵個地方可以同同事飲杯嘢吹下水，同事話唔依間野新開，所以走去試吓。 一日門口，感覺鋪頭比較細，座位坐得唔算舒服，冇得對住坐。位置有點偏僻，一場嚟到，就諗住飲杯嘢先啦。朋友點左一杯cappuccino ，一杯意式咖啡鴛鴦，我就點左杯caffe mocha。點完之後，一睇佢個樣已經唔係靚，普通一個玻璃杯，同普通茶餐廳相同。一飲落去果下真係，_左叫聲，從來冇飲過咁難飲嘅咖啡，朱古力味同咖啡味係可以完全分開，非常利害！每人試咗一啖，都不斷俾負評。價錢唔算平，42蚊杯咖啡，但真係難飲到講粗口。諗住比次機會佢，叫咗個芝士蛋糕，個味仲衰過我自己整嗰啲，都要45蚊一件。鋪頭裝修算係咁，但係食嘢個位置，同廁所都有烏蠅。總括然而，冇下次，請我都唔會食多次，拜拜👋🏻…查看更多