Arbitor的個人專頁

生活太累人，唯有食野好。日日食大學canteen真係會人都癲，所以今晚決定要食餐好！松葉蟹牛油果沙律：蟹肉新鮮而且非常足料！基本上每一口都充滿蟹肉！重點提神的是其特別的沙律醬汁。此醬與一般醬汁不同呈半啫喱狀，口味清新醒胃，而啫喱狀的設計並不是為gimmick而做。平時液態醬汁會浸到沙律底太咸，但此沙律吃到底都可以保持到沙律菜的清爽口感。沖繩雞肝炒韮菜芽菜：肝是一種很麻煩的食材，一但放久涼了口感就會變得很粗糙。店家很細心用燒熱的鐵板上此菜，令雞肝溫度級口感得以保存。雞雞肝非常甘香，芽菜及韮菜吸收醬料及雞油香非常入味，佐酒一流。和牛炒飯：本身對日式炒飯沒太多期望，因為坊間的炒飯都做得一般，要不飯炒得太生，要不就飯跟餸菜的味道夾不來。但這裏的炒飯做得超有驚喜及出色！飯粒炒得分明之餘粒粒都有飽滿和牛香味，原粒黑椒亦增強左炒飯既風味，令和牛和飯香而不膩。炸雞拌特製島豆腐他他醬：炸雞肉很鮮嫩，火候剛好。但最值得欣賞的是島豆醬。第一次食此醬，其口感味道有一點點像他他醬，但與之相比多一份濃厚豆香之餘，內有少量青瓜碎與炸雞非常夾。串燒拼盆：七串才$148的串燒組合免治雞肉棒跟生蛋的組合基本上無懈可擊，其餘還有雞翼、雞肉、雞皮串燒，蔬菜方面則是香菇、迷你青椒、紅芋，燒得香氣撲鼻，完美呈現食物本身的美味！柚子雪葩：上枱時見以柚子作為容器而覺的很吸引，吃一口就馬上發現其內涵絕對襯得上其華麗外衣！柚子味香得不得了，味道清新沒有過酸過甜，飽吃一餐後這是最合適的甜品。沖繩鹽味雪糕：原以為會是很咸的雪糕，但其實鹽的作用是為了帶出奶味的香濃。與柚子雪葩相比有截然不同的風味，兩個都是很值得點的甜品。…查看更多

早年係日本食過，感覺不俗，今日路過尖沙咀見到，又見無乜人，就諗住試下，咁就奶左野啦⋯⋯燒蘋果配紅茶忌廉班㦸其實一上枱見到個pat蘋果批款既餡醬已經有啲唔開胃，搵叉撩下，杰撻撻，食一口，死甜，得個死甜，無果味，算，我食班㦸啦⋯⋯睇相你都可以諗到個口感係點，成pat粉團咁好似放左三日無賣咁，仲衰過homemade啲失敗品。咁都可以賣出街？無QC架？日本和牛漢堡班㦸呢個好少少，舊肉係食得既，但個班㦸都係一樣粉團咁。成餐最好係杯水，溫度剛好，拎黎漱口一流。兩舊七十食到我想嘔，其實theone有好多好選擇，呢間下次真心不了。…查看更多

本身對放題既感覺一般般，無他，年少時經常俾朋友帶去一d $200內既放題，一係就三年都等唔到佢上菜，一係就刺身一咬落去會出雪水，諗起都得人驚，所以放題飯局我避得就避。不過今次同事生日揀左食放題，佢地又話無伏既，所以就試下。食後感：完全對放題改觀！先講d同食無關既野：1.) 上菜速度：好快手，成程無甩單，跟足晒叫既份量，非常好2.) 服務：一般既放題屋儼如戰場，唔好話服務唔西口西面已經還神。呢度我覺得算唔錯，全程加水拎紙有問必答，最緊要係無人西面！食物方面，基本上無邊件係唔好食。必點既刺身無伏，新鮮無雪過籠，壽司細細件份量剛好 (推薦極壽司，特色得黎好食)，海葡萄沙律都好正。熟食方面，燒雞翼一般無乜特別，反而芝麻雞翼絕對係驚豔，一定要試！燒凡立貝都值得一食。澱粉質系都無伏，我叫左個冷烏冬食，都幾多配料！最後仲有高級雪糕作結，正正！非常滿意既一餐，唯一要彈既係要排隊排好耐……查看更多

第四次黎呢間餐廳，每次用餐感覺非常良好。先講食物質素，基本上每一碟都有佢既心思，食材同食材既配搭你係其他地方都未必會食到。而細節位如伴碟既小漬物，每款RECOMMEND俾你既醬料，都同主體食物非常夾。必點既，有牛肉串燒，池魚，三文魚茶漬飯。 (btw 生椰菜任點，唔駛驚話無菜唔健康)服務亦都係好細心，全程食物既上茶時間唔係亂黎，你見到經理係會望住每檯客人既進食速度而決定上菜次序。同埋佢係會認得你當晚點過既食物進而recommend一d唔會太相類既食物，好細心。環境氣氛都好有日本風味，bar檯都唔會話坐得辛苦。我呢個月已經帶左三個朋友黎食生日飯，全部都好滿意。…查看更多

基本上都等到燥左，服務好差，叫極無人理，明明兩點幾非繁忙時間，個個企係度打牙較唔理人。食物質素？叫左碗四川麻辣，得個油字，一啲香料味都無。豬扒合格，米線偏淋，口感太淋…查看更多

一班好朋友飯聚，當然想選間環境舒適，食物可口，服務週到的餐廳。不過今時今日香港，還要是星期六的銅鑼灣，又對吃有點要求的，其實頗為頭痛。人氣食店一早大排長龍，排了一輪，點好菜火速即上，待應就算沒有開口催，吃完想坐久一點都有點不好意思，不在考慮之列。退而求其次，食物普普通通的，價錢又未必如實反映質素，有時遇着樓面服務態度差的，隨時外賣一肚子氣走。今次經食神老友介紹月磯，一試，正路，對辦，以上所有條件，有過之而無不及，值得推介。午市有很多套餐選擇，食神之前交帶三個字，壽司。得，點了八件壽司加一件手卷。先來前菜，有沙律、漬物和蒸蛋。基本。基本功通常最易被忽略，難得月磯做得有誠意，沙律菜醒胃，蒸蛋幼滑，是個好的開始。師傅好細心，見我們吃完前菜，呷完一口茶，聽了一個笑話，剛好想吃東西的時候，送上第一件壽司。坐壽司枱就是有這個好處，師傅即整客人即食，保證最新鮮。因為朋友說話太精彩，師傅逐件介紹的魚名都不太記得，但所謂有圖有真相，A picture worths a thousand words，每件壽司有幾好吃都不需多講。硬要形容的話，倒不如這樣說，如果我是一條魚，變成這樣的一片魚生也不錯，起碼令人回味記得過。偽文青一輪後，要說心水還是會有，蝦壽司刺身配上蝦膏炸蝦頭，層次豐富。吞拿魚腩脂肪比例一流，入口即溶，霸氣絕對外露。海膽壽司是壓軸重頭戲，足料到幾乎要扒入口，大滿足。吃過手卷之後可以選擇柚子茶、甜品或飲品。選了是日甜品番茄啫喱，水準不俗，合格有餘。因為壽司逐件弄逐件吃的關係，進食的節奏不會過急亦不會過慢，這種服務在一般日本餐廳都不太常有。輕鬆寫意地享受了一頓午餐，最重要是見到朋友吃得開心，下次一定會再來！最後開心大發現，現在午市買四送一，好像會到四月尾，結賬每人＄１７０，ok，更正一下，下次＝隔兩日。…查看更多

多年前都寫過佢既食評，最近聽友人講話佢係尖咀開左分店，當然馬上去試下！一入去發現裝修幾特別幾靚，有少少似bar，感覺上呢度Grand過元朗店。開餐！先黎杯凍飲醒一醒，呢個越滿冰非常值得推介！我係其他地方無見過呢款飲品，似係杯凍茶，入面有青檸同話梅，味道好清爽！(飲左兩杯！)酸辣鳳爪沙律，標準越南餐廳有既小食，醒胃。煙三文魚濛粉卷，三文魚同濛粉既配合，就咁食味道略淡，一定要加埋佢特製既魚露。芝士蝦多士，非常邪惡既配搭，外邊炸得好香脆，入面既芝士卻有半流心效果，讚！(每食一舊都萬分罪惡感…但…唔理啦！食多舊先諗減肥啦...)牛尾煲，連火爐上，牛尾煲一直保持溫熱，牛味濃，撈飯唔錯，但我懷疑我地煲得太耐後期有少少「火農」左，建議各位叫佢既話食到咁上下記得熄火。魷魚燴飯，好多地方都有呢個菜，但好多時都似係就咁煮熟魷魚再塞飯落去，飯無魷魚味，但呢度食得出唔同，d飯就咁食落去都好有魷魚味，應該真係擺係魷魚入面燴過，而且佢用既係本身帶味既炒飯，可以辟到魷魚既腥味，好細心既配搭，抵讚！蒜蓉烤茄子，好多時我多好怕食原條茄子烤，一係就裡面唔熟，一係就太乾，呢度算烤得唔錯，但味道無大驚喜。蜜糖蕃茄，問靚仔經理有咩甜品推介，佢拎左個蕃茄出黎，我以為佢開玩笑，一食之下…真係不得之了…呢個堅係是日最大suprise！！入口個下蕃茄好冰涼，一咬落去好多汁好甜，實在無諗過用蜜糖浸過既蕃茄可以咁好食咁fresh，真係做甜品都絕對唔失禮！！強推！！水準Keep得唔錯，抵寫篇食評一讚！…查看更多

永遠都大排長龍既炸豬排店，我記得第一次係食已經係十年前佢仲係廣東道地鋪分店個陣。當時年紀小，吃一口…嗚哇…我以前吃過的炸豬排，原來都只不過是炸紙皮…近年蔡瀾先生介紹過後，佢既人氣更加爆燈，要食就更加難…上個月咁岩經過the One，又咁岩六點幾比較早，就forever alone咁樣一條友入左去。對自己好d，梗係叫個鹿兒島豬排定食。皮薄脆、多肉汁、肉味濃等等既評語，唔駛睇呢篇食評大家都應該好熟識，而我想講既係佢同普通版既分別。我食過兩次鹿兒島，N次普通版，感覺上鹿兒島版最大既分別係肉質。普通版既肉比較瘦，油份都比較少，而鹿兒島版就比較多脂肪，食落口感較滑。好難話邊個好食過邊個，因為兩款炸豬排口感好唔同。不過如果你同我友人一樣唔好脂肪既話就唔建議叫鹿兒島版，你未必會太接受到。…查看更多

最近既一蘭拉麵帶起左一股拉麵風潮，但其實香港本身就有好多水準一流既拉麵店，雖然係五月個陣食，但依然想推介一下呢間Fujiyama55！先黎個煎餃子，非常簡單既小食，但做到脆邊，多肉汁，最緊要係夠熱！非常有heart！呢度既沾麵比較有名，友人叫左個櫻蝦沾麵。見顏色有d似蝦米仔，用麵輕輕一沾，櫻蝦馬上掛上麵條，好有口感。佢有一個小型電磁爐可以加熱，貼心。招牌之一，芝士飯，用你食剩既沾麵湯撈白飯加芝士，其貌不揚，但味道不錯(芝士味略淡，但湯底味夠濃了)。建議兩個人share一份，因為幾飽肚。柚子拉麵，呢個應該係上一季既期間限定，係絕對，絕對，絕對大既驚喜。柚子粒同湯底超絕配！柚子既果香中和左湯既濃味，風味非常出色，我係好少可以食完一餐都唔駛飲野。我成碗係一滴不剩連湯連麵KO晒！…查看更多

平時去親元朗都係去大榮華食豬油撈飯，或者係食壽司，都食到幾悶 (仲要幾貴下…) 聽朋友講最近有間越南野好好食，拉我去試。其實越南菜我成日都聽，但概念都主要係得生牛河同撈檬，本身又對檬粉無乜興趣 (硬係覺得瀨粉食d…)，再加上食東南亞菜多數都會諗起有冬蔭公湯既泰國菜先 (本人嗜湯如命！)，所以平時都好少會去食越南菜。但食過今餐之後，我對越南菜改觀左好多。先黎第一個頭盤，係雞絲沙律，呢個沙律好開胃，酸酸地，肉同菜絲幾夾，唔錯。第二個，係牛肉檬粉卷，靚仔經理話食呢個同食撈檬一樣要點橙色既醋。一試 ... 噢 ... 好正！！感覺有少少似食撈檬，但因為卷出面有層米皮包住，口感超好，無食撈檬個種鞋口既感覺，橙色醋調味一流，呢個菜超級驚喜，睇外表無咩特別但一試難忘！真係好掂！(完全推翻左我對檬粉既壞印像)第三個，係燒豬頸肉 (相都未影就俾人搶左幾片 ...)，呢個做得好出色，夠薄身，真係邊脆內嫩又唔會乾身，好味！(就係因為影呢幅相…我只係搶得一片…)第四個，係蝦多士 (又係未影相先被搶攻 ...)，其實越式蝦餅加多士，幾特別，有朋友勁讚好香芝麻味，不過我本身唔太好芝麻，所以感覺一般。第五個，係醋鍋牛肉，牛肉食得出係靚野，好肥美，d湯酸酸地用黎涮肥牛幾入味，唔駛再點醬都得，食完d牛見d菜墊底無黑黑黃黃幾新鮮下，所以我就放埋去醋鍋都煮，勁好味！不過感覺上呢個鍋有少少貴，如果多幾條菜就perfect。第六個，係椒鹽軟殼蟹，椒鹽味幾香，同埋見到蟹肉！(一般係街食軟殼蟹都真係得個殼...)，不過就咁食就略嫌咸左少少。第七個，紅白米炒飯，食個陣見到一d肉粒，幾好味，但我食極都食唔出係咩肉黎，走去問，噢，原來係越式扎肉。平時對扎肉麻麻，但無諗過用黎炒飯會咁好味，呢個抵讚！第八個，係我重點想試既野，火車頭 (即係湯河)，靚仔經理話食呢個好講技巧，首先要飲左三份一碗湯，於是大家就一人一匙。飲一啖，好有牛肉味，唔濁，同埋唔口渴，應該係無味精，非常好飲，唔好話三份一，我成碗飲晒都仲得！正當我諗住再飲個陣，靚仔經理放左一個小碟過黎，上面有幾粒辣椒粒同埋青檸。:)「你地試下加呢兩樣野落去，個湯就會唔同晒，係另一種風味。」心諗，得個兩三粒辣椒粒，辣極有限，我就倒晒落去再撈兩下，之後大家再試，哇，唔講得笑…即刻變左酸辣湯，好辣，但好惹味！(後尾問番經理，原來個d係指天椒黎…真係唔講得笑…)食到呢度我唔小心拍左粒指天椒落喉嚨，當場噴火倒地… 經理就即刻拎左幾杯冰水黎，細心抵讚！再試埋d肉，牛丸俾人搶左無得試，生牛無過熟岩岩好，最值得留意係佢入面竟然有黑色牛柏葉！依家都幾難有地方食到。食到呢度大家都已經幾飽下，但我又仲有樣野想試…第九樣，雞翼，呢個又係超掂，雞翼外面層皮好正，雞翼既肉都好嫩，同埋好大隻下！埋單一個人都八十蚊有找，都幾抵下！(後記；其實有幾碟野既底部都有墊底生菜，而且都新鮮下，我地將佢地全部放晒去醋鍋度煮，好正！強烈建議叫得多野食既話叫埋呢個鍋黎煮菜！)…查看更多

朋友介紹去食中東菜，心諗中東係地國既邊一度我都唔知，更勿論當地既食物，不過佢盛意拳拳話呢間野係OpenRice爆好評，咁當然要一試。都幾爆場，等左陣先有位，不過經理好好人，未入場已經介紹下餐牌過我地。坐低，點菜！第一味係芝士薯條！(未影相已經俾人偷左兩條)經理細細聲咁同我地講：「呢個薯條一定要係兩分四十秒內食完。」大家聽完問都唔問就開始亂挾！三種汁撈埋真係好爽，橙色個隻辣辣地，芝士味都幾濃，薯條有汁都唔會太淋，好味！個個都大叫薯條正，經理問我地想唔想知薯條咁好味，心諗佢係咪有咩秘方會透露一下…「因為你地太肚餓…嘿…」LOL 呢個經理真係超gag！第二味係燒雞沙律，呢個我個人覺得一般無乜特別，可能因為醬汁同薯條差唔多，同埋我覺得作為沙律佢濃左少少。第三味係烤雞Pizza，堅正呢個，我本身對pizza興趣唔大，但呢個pizza芝士夠重手，個餅厚薄剛好，烤雞味濃，好夾！第四個係烤羊肉配薯條，睇相可以見到得番綠色同白色醬無左橙色醬，相信係經理見檯中有人不太能吃辣，幫我地走左個橙色辣醬，好細心。講番個羊肉，真係唔講得笑，好香口，好有羊肉味，鍾意食羊既話呢個必試。第五個係乳香芝士咖哩雞，OK啦，無咩特別，略嫌雞肉較鞋身。最後係炒飯 (我唔記得係咩肉)，幾得意，佢應該係用d印度長米黎炒，好長身d米，但我覺得飯味無中國米泰國米個d咁重。中途由於幾辣下既關係仲試左呢個芒果奶昔，好濃好杰呀！朋友們對佢既評價不一，我覺得解辣不錯，但解渴麻麻，因為真係幾杰，但係好飲既！(後記：七個人埋單三百五十，咩話？咁平？我地check完發現原來佢無計到d野飲錢，相信係走漏單了，作為誠實能，再加上經理咁好人，我地當然係話番俾經理知啦！最後都係四百幾，平均一個人都係七十蚊，抵啊！…查看更多

朋友話佐敦有間好出名既咖喱店，見最近面部火山爆發情況不算太嚴重，就去試一試。去到門口就見好似孖寶兄弟咁有兩間阿/亞龍…「亞龍咖喱先係堅架，記住啦！」朋友再三提醒，心諗，朋友都算細心。入到去d位都幾窄，不過我一向重視食材多於環境。望望餐牌，見有大中小辣，正當我諗住叫個小辣試試水溫…「我會叫小辣，因為我好唔食得辣，你既話叫中辣都得啦。」朋友提議說到。於是我地就一個叫小辣既咖哩牛利，一個叫中辣既咖哩牛利。「我記得架，你好食得辣架嘛，叫中辣就岩架啦。」朋友說著，心諗，朋友果然係好細心，連我既口味都記得………咪住…我記時話過我食得辣！？正當我想舉手截單時，已經有兩個牛利飯上左檯…兩兜既內料差唔多，就咁睇都只係見到一pat洋蔥蓉係面，之但係你只需要半秒就分到邊兜係小辣邊兜係中兜…中辣個兜…好似嘔完血咁有一灘紅色既油係面…試食一啖…噢哇呀呀呀…唔係講笑，當場噴火…個種辣，係不斷咁湧上黎…不過雖然好辣，但未致於去到失去味覺既程度。呢度既咖哩同一般係茶餐廳/扒房食到既好唔同，辣得黎好香，唔會好似漿糊咁杰，睇其他食評先知原來佢既成份無椰奶，但好濃好香，堅好味，用黎撈飯一流！！((不過我d眼淚都係咁流…))雖然好好味，但中途實在係頂唔住，於是叫左個青瓜。呢個青瓜既食評可能會幾唔中肯，但個一刻我絕對覺得佢係全宇宙最好食既青瓜，解辣無比。非常重口味的一餐，一個人都唔駛五十蚊，絕對ok。「係咩？你唔食得辣架？我記錯左掛哈哈…」哈…哈…? . . . . -____-…查看更多

見之前既食評多數寫飯，我決定寫下佢既粉麵。其實一般去到茶餐廳都唔會叫呢類湯粉麵，一黎選擇多點揀都唔輪到佢，二黎質素通常都無乜保証。但我見佢個配搭好吸引，貴妃雞墨魚丸，兩樣都係我心頭好。叫完，餐飲凍檸茶先到，唔錯:)，至少唔係糖水黎。之但係飲左半杯等左三個幾字都未見到碗米線…:(終於跟左兩次單後碗米線先黎…上下打量一下，哇…都幾大碗…墨魚丸三大粒，無呃秤，無骨雞絲都幾足料。:)味道方面，甚有驚喜！墨丸彈牙唔粉，味道都幾濃，雞絲好滑而且好有雞味！米線就略削不過都可以接受，湯就本身一般，不過有雞油調調味，香好多。茶餐廳既湯粉可以做到咁，絕對係抵讚！所以都不得不將我第一篇食評送俾佢！…查看更多