daisy_daisy的個人專頁

係OpenRice 搵到呢間野，睇相以為好chill, 原來只係個室外睇落好靚，室內裝修好普通，而且好迫。同平時啲樓上Cafe，佢好少少🤏環境第一差；第二食物差，嗌左和牛漢堡，點知個漢堡扒好多筋，又唔juicy 無乜肉味，食到我想嘔，吞唔到落肚、真係太多筋。第三差，就係價錢方面，頭先個咁差嘅和牛漢堡HKD$178,加埋一就成兩舊水，食落差shakeshack 九條街。佢如果賣60蚊，我無野講，佢只值60蚊，賣200 就係太over.以為漢堡跟薯條，點知原來係跟薯仔，薯條另加錢。beans 都好過佢。唔會再來。…查看更多

朋友俾左張50蚊coupon我，同男友來呢度食餐好既。上次其實來左食佢個牛肉漢堡，覺得唔錯。所以今次來食晚餐就無再嗌漢堡，試下其他野。我見OpenRice d 人都有讚下話佢塊肉眼好食，其實我本身麻麻地肉眼，我鍾意食西冷多啲，但見肉眼好評咁多就試下啦，反正如果食唔晒都仲有男友幫我解決呢個係餐湯-蘑菇煙肉忌廉湯，湯好濃郁，應該真係落士忌廉而唔係打芡既。因為我聞到好香既奶味。岩晒我口味。呢個係Caesar salad，用黑醋同olive oil dressing ,健康前待已久既肉眼扒終於來喇，10oz都幾大塊,隔離有啲火箭菜伴碟。肉眼扒我地嗌左七成熟，切開真係七成一咬落去，不得了，牛味濃，好嫩，真係好有牛肉味！好正。呢個下次來一定會再嗌！第二碟係德國咸豬手。上來既時候拆好晒肉，皮好好好脆，肉好實。同我係德國食既真正咸豬手味差唔多。唔錯，但我同男友係呢個時候都食到好泄了。題外話，來左呢間野兩次，都發現一個好有趣既地方，就係侍應好多，但大多數人都係係門口行行企企自己圍威喂傾計，同淨係望門口，入面啲食客舉好耐手都無人見到，我唔知係特登唔想做定點，淨係望門口架喎真係。又唔可以話態度差，不過就係hea 住做…查看更多

沙田中央廣場呢三四個月開左好多新食店，上次試左the salted pig,今次來同其他三位同事來試呢間。呢間主要係食鐵板燒，仲要係可以自己燒，感覺應該幾好玩。十二點搭七到來到店鋪，仲有好多位（可能呢間位位置比較偏避，所有好少人發現）。一行四人，侍應帶我地坐卡位，卡位位置闊，坐得舒服。呢度有lunch set ,我嗌左肉類雜錦炒面，連沙律同飲品都只係88蚊（未包加一）沙律好食，有海帶生菜芝麻醬同白蘿蔔絲同事叫既道頓崛炒面我既肉類雜錦炒面，故名思意，有雞牛豬三種不同肉類，仲有紅蘿蔔青椒同芽菜配菜。由於個鐵板面積有限，我地幾個叫左鐵板燒既人要輪流。每塊鐵板最多可以同時俾兩個人燒。呢個係少少不足之處。所以建議一次最多兩個人來一齊食就岩晒。肉類望落粉紅，頗新鮮，自己炒開頭有啲 le hea ,但後尾越炒越好玩。首先落晒啲肉同芽菜，俾佢煮個三四分鐘，之後再落面，再淋上餐廳提供既肉湯，等就熟就淋上餐廳特制醬料！完成。分量頗多，幾夠飽！飲品方面我叫左乳酸梳打，飲品底沉澱住啲白色乳酸，攪匀後，小小酸酸地，不太甜，解膩解渴。唔錯！呢個餐88+10%，只係97。係我個人覺得性價比好高既一餐。…查看更多

同一大班大學同學出來gathering ,人大左就唔再係食西餐喇。依家鍾意食中餐，大排檔個啲。人原來真係會係不知不覺中長大。以下呢張單係第一張單嗌既，後尾唔夠食係有再加餸既。上湯菜心苗，好清，好多餸，超足料。呢煲叫亂棍打死野牛王，個名搞鬼，味道唔錯，牛唔係個啲超腍個隻，但無筋好味！椒鹽九肚魚，九秒左無晒，炸物只要係新鮮炸都好難唔好味掛，放膽嗌啦！食雞！好味！超！級！嫩！好腍，好入味！必食！我唔太愛雞，都食到停唔到口！蒜茸節瓜，估唔到我地會嗌啲咁健康既野佢係一煲豆腐煲，無錯。係豆腐煲唔係鯪魚滑煲，我都差啲認佢唔到！好足料，清，好好味！最後啲男士仲未夠飽，就是但嗌左個煲仔飯。煲仔飯普通料，唔算好味。全餐食咁多，都係好平，而且好足料！值得再來！…查看更多

又打風喇，雖然話暫時都係風平浪靜，但街係條街，你會感受到打風既氣氛。決定去K11食平時好多人排隊既pan de pain食pancake!點知都仲係有人排隊😅（仲諗住打風會少啲人排）不過唔緊要啦，𣇉後都係好快就入得去。我地決定嗌個原味同嗌個snow white pancake.係度等緊既時候，睇住其他枱食，哇真好煎熬，吞晒口水！終於到我地！極速影相，即係，好香，好鬆軟，蛋味香，甜味都中等甜啲，不過ok既接受到。呢個snow white 來到覺得好靚（嗌個時想食啲好奶既野，依家睇返覺得好漏）食落真係好甜呀！太甜喇，越來越甜，甜味疊加，男友同我最後幾啖都頂唔順。但呢個snow white 個pancake 同原味係唔同架，佢係傳統薄pancake我同男友都覺得無咁好食。一致覺得原味好食啲。…查看更多

一放工就趕過來銅鑼灣做facial,都無時間食野。做完facial 已經成九點半喇！餓死。於是乎做完即刻狗衝過來睇下有咩小食岩食。結果就選中豪大大雞扒！我將我既第一次就咁俾左老銅呢間分店！無錯！我係從來無食過豪大大雞扒架！無論係台灣定香港！佢既名氣就吹左好耐，炸雞攞上手個下，哇熱辣辣,摸都摸到佢係十分之脆架！而我係嗌左有辣架。以本人食譚仔二小辣既程度來講，豪大大雞扒既辣真係其實我食唔出有辣。（各位為食家自己measure 下啦）😂塊雞扒，一咬落去，係脆既，但開頭第一啖，覺得咦好似唔係好夠咸喎。但肉好淋，亦有肉汁，口感唔錯！但食到後尾，我覺得店家將啲肉唔整得咁咸係岩架，因為咸味會疊加，當食到最後一啖時，個味道係岩岩好。但你話呢間野既味好驚為天人咩，又唔係喎，好難食咩又唔係喎。四個字形容佢「正正常常」或者「不過不失」。 …查看更多

報左個興趣班，星期日要旺角上堂，咁上堂之前就來附近填飽個肚喇。呢間野，我不嬲都save左係openrice 想去旷list 度，今日見個時間仲係tea time,就心諗來試下啦。見到佢有burger ,小妹更加係興奮。同侍應講兩位，之後佢問我地坐唔坐室外，男友話唔好，因為驚落雨，但其實佢室外既環境係幾靚架，秋天都差唔多來喇，遲啲如果有機會再來，要試下坐出面。室外係高枱高櫈，似bar,岩飲酒吹水咁我坐低左之後，諗都唔使諗就揀左beef burger (重申，小妹係burger 控）男友又選擇障礙病發，睇完自己張menu,又攞我張menu來睇（明明兩張menu係一樣🤦🏻‍♀️）等佢終於決定到喇，佢嗌個chicken pita bread ,我嗌burger,點知呢個時候侍應同我講話無晒burger!!!!!! O!M!G!!!!!好失落，最後改選左個Mexican chicken wrap .個wrap啲汁呢我估係有蕃茄成份，而入面啲料就有雞肉啦，青椒，紅椒，飯。係唔錯既好味既，不過男人食就應該唔飽喇。…查看更多

Weekend 去左雀友屋企個會所打麻雀，打到九點走，去附近搵野食。見到呢間咁夜都仲有開就入去試下。第一碟串燒，雞肉同豬肉，秘制醬汁，醬汁好味，肉就正常。雞肉西柚沙律，雞肉好滑，酸酸甜甜，好開胃。生蝦，唔知係咪夜既關係，啲生蝦朝早入貨，到夜晚都雪左十幾個鐘，搞到啲蝦唔鮮甜，麻麻地炒粉絲，因為同行朋友唔食得辣，所以左下角啲辣椒係無撈到入去架。啲粉絲炒得幾爛架，斷晒，但味道就都ok.之後仲有嗌左啲薄餅，炒通菜同咖哩軟殻蟹同波蘿炒飯。（掛住食唔記得影相）薄味牛油味香，味道好，但比起印度薄餅，佢係偏油。炒通菜，見到落左勁多青辣椒條同指天椒條。成碟菜勁辣！咖哩軟殻蟹個蟹有兩細隻，夠三至四個人share 來食，咖哩唔辣，但係屬於椰奶味重既個種，個人都幾鍾意呢隻。最後個菠蘿炒飯，個人覺得係必嗌架！勁多蝦好足料，都食王少少菠蘿粒，成碟飯炒得好鬆，唔太油！好味！五個人我地仲有嗌左幾杯野飲都係一百蚊一個人！小店值得支持下！…查看更多

話明糧尾，即係無錢啦，又點可以食豪啲食多啲有選擇呢？做人最忌無得揀，所以就算糧尾都唔可以虧待自己個胃！一於來人民飯堂薩利亞食好啲！唔係講笑，呢間野仲平過大家樂，份量比起大家樂唔單止無少到，我仲覺得係多添呀！男友於工後同老細飲左兩杯酒，飽飽地，所以我就無得大嗌特嗌喇。咁我就嗌左碟carbonara ,32蚊咁平都做到有流心蛋👍🏻值得讚既而且份量好大碟！男友都嚇一跳！呢碟雞扒係男友既，我原本以為塊扒會勁細（之前係美心MX食過晒鐵板雞扒中過伏，勁細塊）點知真係好surprise,係份量十足既，夠厚夠大夠飽，不過聽男友講係咸左少少。最後心思思嗌左碟小食，辣味雞翼！夠入味！都幾辣～唔食得辣既應該會食左標眼水。今餐總括食左81大元兩個人！勁抵。…查看更多

唉，星期五同同事出街食午餐，遲左出來，仲驚啲餐廳好難攞位，點知行過Brick lane delI, 見到menu唔錯，竟然仲有位！即刻入去坐啦，好興奮！點知真係大大地失望😞由價錢，到食物質素同份量都係差差差。價錢貴啦首先。我個burger 88蚊，無薯條，無飲品，野飲另加18，即係話我如果要野飲同個淨burger 就已經106。如果跟set,就要加25蚊，但注意，跟set 的話，佢個menu就畫左有湯，有薯條同沙律，但加25蚊只係跟三樣既其中一樣，如果你要晒三樣就唔該俾75蚊呀！我真心xyz佢囉！個burger 來到，個樣係正常既，但食落就中伏，哇個漢堡扒勁多硬既筋，咬到係一粒一粒又硬又韌既口感。食到好攰呀。淨咬塊扒，無味既！喂，你都唔係收得平，唔該整返好你地食物既質素得唔得呀！我地全體同事都表示唔會再來！至於另一個女同事嗌左個all day breakfast , 份量少得可憐，但價錢無少到，味道同食物種類都無特別。…查看更多

個個拍拖，個個都知要去邊度拍拖咩。拍拖拍得耐，都真係唔知有咩做。小妹係沙田返工，見好耐無同男友行沙田（雖然都唔知有咩行，個個商場啲鋪都一模一樣，行邊都一樣），就同男友放工齊齊行沙田。放工肚餓，就去新城市最多食店既七樓行下睇下有咩食。行過呢間新開既食店，有個年輕人好熱情咁企係門口同我地介紹，態度親切，於是乎我地決定入去試下啦。年輕人介紹左個蝦湯面俾我地，咁人地咁有誠市咁sale,，我決定試一試個招牌。而男友就見佢個咖哩飯做緊特價，佢就試個咖哩飯。而另外，我地嗌左大蝦炸雲吞。我嗌左油面底，碗面來左之後，見到有五隻大蝦，而菜都真係有好多！好開心呀，因為小妹好耐無食菜喇。慚愧😅飲一啖湯先，真係好鮮甜！好飲！唔怪得之年輕人話有啲客飲埋碗湯架！但係男人個咖哩飯真係麻麻，無咸味無咖哩味，好水好淡。點解會咁架？有啲失望，希望年輕人見到我地個意見可以改良下個咖哩。而個炸雲吞，每個雲吞入面都真係有蝦架！新鮮即炸好脆口，鹼水味略重，有進步空間。但年輕人既優質服務態度真係無敵！太好喇！…查看更多

星期日來呢頭食下午茶，行左幾間，最後揀來揀去來左呢間新開既文華冰廳。以為新開一般水準都會係比較高。所以決定一試！行入餐廳已經feel到係一片混亂既安排，門口收銀問左我係咪兩位，就由得我行入去，完全無安排位俾我，而我入左來之後，之後又有街客入來。全部係間咁細既鋪頭入面行來行去自己搵位。好亂囉。五點頭，仲有下午茶，我嗌左份煉奶西多，男友嗌左五香肉丁公仔面拼炒蛋牛油厚多士。男友話面太淋，肉丁太硬，完全唔得呀。入唔到口。我既西多到到，表面炸得金黃鬆脆。切開入面無夾醬架，淨包。佢個包好鬆軟，連煉奶同牛油食，好香奶味重岩晒我。但食晒就好流，所以呢一定要嗌檸茶解流。最後男友既炒蛋多士來左。佢話個炒蛋唔錯，好滑，有蛋味。成餐埋單66，下午茶。…查看更多

由沙田去中環開會，為左節省車費，由沙田搭的士去九龍站，再轉地鐵過海。所以呢我係九龍站落左的士之後，就去element 食晏先。呀頭帶左我來the pantry ,呢度係我第一次來食，而序前亦都無聽過有呢間野。坐底後，見到lunch menu有soufflé pancake all day breakfast,即刻諗都唔使諗就決定要呢個。來到之後，見到勁大份勁開心呀。由於食物種類繁多，我個腦要即刻決定食野既先後次序。我決定食pancake 先。入口好鬆好輕盈，好香蛋味！唔太甜。岩我口味。而第二樣好味既就係炒菇，其他三樣：蛋腸仔同煙肉都一般啦，不過不失。不過我想特別提一提個煙肉，佢呢度係用厚身啲多肉既煙肉，味度無一般個啲咁咸，亦無一般個啲咁脆身，佢係屬於有得咬下既（即大係肉片）個隻，我個人來講都幾鍾意呎隻。…查看更多

去沙田新城市七樓食完晚餐，醒手起係喎，沙田好似有一芳，一芳好似有黑糖珍珠奶茶，決定快快食完飯來買黑糖奶茶。來到門口，見到一芳黑糖珍珠奶茶每日限一百杯😮，而且門口貼住個售罄。好失望。店員聽到同男友講「無晒黑糖呀，賣晒喇！」，店員急急住澄清話「仲有少少」；我即刻雙眼發光，買！黑糖珍珠有鮮奶又或者奶茶，男友揀左奶茶。攞到杯奶茶後，男友想即刻唧穿杯野，好彩來得切阻止佢，我話要搖勻先呀！搖勻左後，一飲，哇黑糖味呀，哦～原來係咁既感覺。今次真係純粹出於好奇，究竟咁紅既黑糖奶茶係點架呢。今日試左滿足左好奇心，我諗我唔會再試喇。不過杯野真係貴，成33蚊杯😫…查看更多

係火炭上完興趣班，諗住下半場來旺角東行下。有啲肚餓，於是乎來moko搵下野食。一入商場就見到呢個大大個招牌，就醒起每次來都好想食呢間，但都唔捨得食。好啦，今次就來豪下啦。來到大約六點去到，門口無人，入面都仲有少量位置，唔使排隊就入到來。睇完個menu,都幾多野揀，我又係揀左burger (😝我真係好鍾意食burger救命）今次個burger 係韓式style,有泡菜醬，甜甜咸咸都ok.成個漢堡好厚，所以我開頭係分開一層層食架。塊漢堡扒都應該有成寸厚，但牛味無乜，肉質唔會乾身呀（難道我今次食既同之前啲食評人食既漢堡有唔同水準？）我咬落去係juicy ge,但就無乜味，可以係為左中和返bacon既咸。bacon同韓式醬好咸，可能因為咁佢個扒無調味（係掛？）不過認真無牛肉味，過百蚊既漢堡咁既質素係唔太接受到。建議呢樣要改善。至於薯條，係帶皮薯條，炸得脆身，咸度岩岩好！仲有湯同蜜桃飲品都係高水準之作。…查看更多