sn2011的個人專頁

試新嘢! 幾有驚喜! 法國甜品。(法國人整嘅甜品)伯爵茶好香覆盆子朱古力最受歡迎椰子芒果又香又甜士多啤梨忌廉滑溜溜黑芝麻綠抹茶……我冇試價錢方面，有點貴，如果單買一個正常size係$45@迷你撻一盒就$390 (合理好多)…查看更多

朋友話佐敦開咗新火鍋店，一行十人，試下新嘢。新店開張，地方當然企理。老闆好好人，10位大枱，比咗間房我地。全晚火鍋料都好新鮮，食得開心，攪到唔記得影相。（好多嘢都冇影…）首先講下湯底。我特別推介呢個冬蔭公湯底。湯底來到未食已經知道冇叫錯。香氣四溢，材料十足。好辛辣嘅朋友可能會失望，因為唔係好辣，但超級惹味，湯身濃厚。另外再選豬骨原味湯底。原味湯底都唔錯，配海鮮唔會搶味。火鍋最緊要材料新鮮，試咗幾款都冇失望。手打四寶丸手切牛肉牛肉粒東星班萵荀冬瓜片後來把心一橫，叫埋會游水嘅阿拉斯加蟹，豪一次！非常鮮甜， 超好味！仲有：即炸響鈴冰菜豬肉條滑滑豆腐冰豆腐蟹蓋唔好嘥，攞來炒埋飯。炒得好乾身仲有必食油炸鬼……，我唔記得個菜名…飲品都要一讚～老闆話竹蔗水係自己煲，唔係出面交來。好有心做嘅火鍋店！…查看更多

响旺角想搵d可以慢慢食，傾到計，d嘢又好食嘅地方唔多。呢期朋友有好介紹！訂枱後，有whatsapp message 確認。三人晚飯，未能試太多款式。水準不錯，員工友善，價錢中上。咕嚕肉，唔會成口炸粉，甜酸適中，配新鮮菠蘿，好清新。油泡大蝦，蝦爽口。蔥油走地雞，雞肉嫩滑， 蔥油惹味。蠔餅，一般啦，嫌未夠鬆化香口。送嘅！菠蘿刺身整體來講唔錯，食物新鮮，地方整潔，又任坐唔嬲。旺角鬧市難得。下次要來試老火湯！有其他客人叫咗，香到隔兩張枱都聞到！…查看更多

中環食午飯搵食難，新食店就更多人。 十二點已經人頭湧湧，等咗大概十五分鐘。 當日天氣炎熱，等候期間店員窩心，攞咗廿幾杯清水比店外等待客人。店鋪環境簡單乾淨，前面部分係高檯高櫈,後面部分還有卡座。食物款式選擇足夠，湯河、撈檬、春卷、粉卷、越南三文治、甜品、食品都有。牛肉湯河 $88豬頸肉撈檬 $68三文治$28甜品（忘記咗名字）另外試咗柚子沙律、米紙卷。其實我唔知佢味道夠唔夠正宗，但我就覺得味道唔錯！而且價合理，讚！（提提大家：試業期間，只收現金）…查看更多

路經廣華街遇上驚喜。新店，裝修簡單新清，令人喜悅。食物種類選擇不錯，smoothie 、窩夫、中式甜品都有。主打係水果星球，不過我對啫喱不太感興趣。可惜只得兩人，試唔到好多嘢。最後叫咗芒果雪之國同白雪椰果撈加芋圓。芒果雪之國- 芒果、士多啤梨、綿花冰綿花冰唔係太甜，唔錯！白雪椰果撈 - 龍眼、椰果、黑珍珠、西米、亞荅子、底有椰汁冰我仲追加咗芋圓， 因我自己很喜歡芋圓。每樣材料都唔係好甜，配得很清新，甜度剛好。而家講求健康，咁樣做甜品就剛好。又不失食材本身嘅味道。喜歡清清地嘅甜品嘅朋友，一定要試。食完才响其他食評發現珍寶芋圓被大力推介。膽粗粗問店員可否要一客珍寶芋圓食一下。店員很幫忙，就當我地嘅甜品追加珍寶芋圓，安排三粒用小碟裝起。真好唔食由至可，一食不得了。內有芋頭餡、蕃薯餡，超好味。真心推介店員友善，地方乾淨，食物味道清新好味。一定會再來！…查看更多

6月16日中午飲茶-服務極度不好，下至侍應， 上次部長經理， 全程黑面，十問九唔應，唔知係咪稻香冇糧出。問多兩句仲鬧返轉頭， 離曬譜， 唔會再幫襯！入座已經混亂，帶位職員又好似趕收工咁，如果可以我自己搵位算啦。坐低後，發現原來全場職員都係極品，全程黑口黑面，有問冇答。叫多沖 一壺茶， 做睬都唔睬你，收唔收到都唔知， 嗌咗三次都冇，唯有叫部長啦， 佢仲話：[嚟緊啦， 要我行嚟行去]。 唔怪得啲細嘅都黑面啦，做部長都係咁。其實唔開心，可以唔做， 何必難為啲客，又難為自己 。冇當面投訴，因為怕比人加料但今時今日咁嘅 服務態度…食物：一般稻香水準。不過就算再好都唔會幫襯。…查看更多

聽聞有新鋪開張，一於去試下。中環中午放飯就梗係人多，但估唔到真係要排咁耐。如果唔係大家咁高興話要試，我真係唔會為個漢堡包等1.5鐘頭。鋪內座位唔多，鋪外係全露天公眾餐枱椅。遇啱落雨最後都係買走。漢堡包漢堡牛肉唔乾，幾好。加埋芝士、蕃茄、生菜，味道不錯。可惜因為外賣，味道打了折扣。雞肉漢堡雞肉有點燶薯條/芝士薯條我估堂食應該會好味d。fifty fifty 檸檬水加凍茶冇咩茶味，個人覺得太甜奶茶shack 香港限定，但同事話仲甜，咪搞反而啤酒唔錯。因為下午仲要返工，唔能夠飲啤酒。但職員很好，斟咗三隻比我地試飲。其中Summer Ale唔錯，少甜幾清新。…查看更多

我唔熟悉葵興，純粹路經。只因肚餓而亂入。星期六下午5.30，成個商場得三四間有開，是但入，咁…就出事。服務其實好好， 衛生也不錯。但唔明，只係普通茶餐，點解會做成咁？火腿奄烈，多士全餐廳得三個客，我份餐應該係即煮架啦，但點解奄烈係會凍嘅呢？ 沙爹牛肉麵碗麵…， 林bet bet。咩解救？ 最抵贊係杯花茶。32蚊茶餐有花茶飲，讚！我估平日應該有好多學生，街坊幫襯。响區內一定有佢嘅功能同定位。我都喜歡支持小鋪，希望佢加油，多多留意食物質素。…查看更多

唔知係唔係新開，還是係地方比較偏僻， 冇訂位、 星期五 、午餐時段 ，都可容易入座 ，其實全場得三檯。（ 其實心裏有點怕中伏）。地方整潔舒服 。午餐時段，除 set lunch外，亦可揀普通 menu。前菜沙律饅魚飯套餐 豚肉生薑燒套餐甜品提子Rum酒雪糕食物質素好 ，饅魚絕對係靚嘢，哈哈，食物同價錢成正比呢。一分錢一分貨。二百幾蚊一個午餐，打工仔來說： 好貴 ，間中都可以。地方清靜企理， 冇乜客人亦係好事，適合見客 、同事聚會。…查看更多

同事帶我到中環樓上店試新野 ，老撾菜。午餐時段提供小食、老撾米粉午餐、老撾見求（飯）午餐選擇。午餐配熱飲，可加錢轉凍飲、特飲。米粉有四款湯底。同事叫咗雞肉米粉。預設湯底係雞湯。但原來有亮點，好特別，雞湯加椰汁，好味。我要豬頸肉米粉，海鮮湯底，ok啦，穩穩陣陣。老撾粉比較硬身，與香港米粉同台灣米粉大不同。另外試咗南薑香茅熱飲同荔枝梳打。提一提， 佢哋有提供素菜菜式，食素人士又多一個地方可去。可能我地早到（12：00），唔算人多，環境算清靜，簡簡單單午餐幾好。…查看更多

泰聚已經開了好幾年，常到聚星樓嘅我始終未曾到訪。昨天終有機會試試。晚上6.30，食客未有太多，未有訂位都能入座。因星期六日，坐1.5小時就要交枱。環境整潔乾淨，有代客泊車（免費）， 招呼也周到。座位安排到樓上，自成一角。不過如果下次再來，要試坐樓下， 氣氛好好多。因為朋友不好辣，所以沒有點辣嘅菜式。泰式干炒河粉蝦餅黃咖哩（不辣）椰汁冰椰菜苗炭燒黑毛豬扒仲有蒜蓉包，珍多冰。埋單$800，四人，泰國菜來說不算太貴。老實說，味道不是太正宗，已經香港化，但味道不錯。可以再試。…查看更多

應該有兩年冇幫襯Outback , 見元朗新開咗一間，趁亞仔生日去試試。可能因為係平日，七點鐘晚飯時間都唔使等位叫咗兩個appetizers - 炸蘑菇&洋蔥, 可惜兩個都炸得唔好。Blooming Onion 好油（上次响其他分店好得多）。太耐冇去，連麵包轉做型我都唔知。主菜試咗肉眼扒，豬肋骨, 燒雞肉芝士夾餅。肉眼扒味道平平，勝在佢真係做到五成熟，ok啦，但配菜焗甜薯好好味豬肋骨只係一般般Chicken Quesadilla 夾餅乾咗d。（食呢d都係去Cali Mex罷啦)甜品叫咗個低糖咖啡奶凍。反而呢個好味因為生日，送咗一客芝士餅。多謝！唔知係咪我要求高咗，總覺得食物同服務都係一般，好似唔係好值。…查看更多

每次幫襯小町都好開心，每次都食到用心嘅制作。凍豆腐好味餃子义燒拉麵，正（裏面嘅糖心蛋好好味）只嫌今次拉麵嘅溫度唔夠熱自家制蛋黃醬沙律咖哩飯，拉麵以外嘅選擇支持小店！用心，認真。…查看更多

佢係我响香港暫時食過最好味嘅pizza。（以我井蛙嘅意見來講）餐廳位於蘭桂芳入口，一去到就見。餐廳氣氛輕鬆，舒服。午餐時間有set lunch揀，有頭盤，主菜，咖啡茶,抵食好多。我當然主攻pizza。Pizza旁邊好多氣孔、好脆。有炭烤味。口味選擇亦多。侍應生好細心，話等我地飲完個湯先入order做pizza, 請我地等等，怕pizza太早來到，凍咗唔好食。另外叫咗意粉，味覺亦好好，意粉軟硬剛好，醬汁掛得上，但又唔會太濃。試咗兩次，水準穩定。推介！…查看更多

上兩星期，同事帶我去响食咗個好豪嘅午餐。 間餐廳响蘇豪區一條靜應應嘅街度。門口唔多起眼，未去過嘅我，大鄉里出城，真係錯過咗都唔知。入到餐廳裏面感覺又截然不同。裝修唔係華麗，但好有氣氛， （法式風情？我唔係好識）空間寛敞，紅色卡位襯格仔枱布，座位旁放滿紅酒，餐廳中間有酒吧。最鐘意d 枱墊紙，好靚。講番食物，呢到冇餐牌，因為只有牛排。$299一個餐，有沙律，麵包，牛排，同無限添食嘅薯條。坐低後， 靚女侍應生就會問你件牛排要幾多成熟，跟住就上麵包，沙律。沙律唔錯，簡簡單單，Green salad with walnuts。牛排來到嘅時候已經幫我地切開咗，侍應生會將牛排放上一個架到暖住，薯條就另外加上碟。牛排半熟剛好，好嫩滑。唔使點咩醬都已經好好味。不過都要試下佢地嘅自家醬汁。薯條新鮮炸起，好得。整體感覺好好。對我地呢d打工仔來講，三舊水一個午餐，真係好貴。但間中一次半次，當獎勵下自己辛勤工作，都ok。加上有咁嘅環境同食物質素，值得！…查看更多