lolitacrazecream's Profile

同朋友星期六去旺角行街，經過兆萬，有人派傳單介紹依間放題，行到攰想坐下又肚餓，就決定嘗試下。餐廳裝修正常，光猛乾淨，窗邊既卡位好闊，夠曬位。果日唔多人，所以都被安排左坐係卡位。侍應一坐低就提我地可以快d落左魚生船同壽喜燒先，仲即刻上左配菜同醬汁，服務唔錯。配菜有幾種唔同款，味道一般，食左少少中華沙律，留番個胃食其他野～飲品選擇幾多，我仲簡左荔枝烏龍茶，甜甜地但又唔怕太膩。食日式放題就一定有魚生船，送到過來既件數比我地叫既仲有多左。全部魚生都色澤鮮豔，夠凍夠新鮮。d甜蝦特別鮮甜，肉質算彈牙，唔會好水咁。壽喜燒賣相好靚，好多牛。食落湯底幾香，仲有麻油味。炸物新鮮出爐，熱辣辣，特別好食既係炸榴連。裡面有一絲絲榴連肉，又脆內軟，好香好好味仲叫清酒煮蜆，好多蜆，多汁，鮮甜。火灸壽司既飯同魚生既比例岩岩好，可以一啖一舊，表面燒到焦香。仲叫左一口牛柳粒，牛既質地夠稔，而且唔痴牙，調味好夠，另外既配菜都好味，特別係薯仔係焗薯，正。叫多個通菜，賣相靚，食落稍咸但唔辣。食左個焗蝦，好多沙律醬，外面燒到焦香，好味。牛油焗菇，好香牛油味。最後因爲太飽，所以無食到，但見到冰櫃都有幾多簡擇。整體既質素好，侍應服務良好，上菜快，上得足，唔會專登上少d。覺得可以再去食。…Read More

成日想嘗試螺螄粉，平日搵咗朋友去試。我地午飯時間左右去，餐廳雖然近地鐵站，位置唔易搵。一去到就有位坐。我哋叫咗一碗柳州螺螄粉，一鍋蜆，兩罐汽水share食。柳州螺螄粉賣相好吸引，好多配菜，好多人都話佢嘅味道唔係個個接受到，我都係抱住挑戰一下嘅心態，冇諗過會幾鍾意個味。聞落去其實似係街市經過賣榨菜嘅檔攤果陣味，食落辣辣地，越食越過癮。另外叫嘅一鍋蜆，賣相同樣吸引，湯底禮奶白色，又有粟米同埋好多蜆，味道鹹香，好好味。整體來講，服務良好，侍應主動介紹加錢可以有任食配菜，不過我哋兩個人就冇叫到。食物質素良好，味道好加上分量足夠，性價比高。平均一個人大概食左80 蚊到。…Read More

平日同朋友放工食晚飯，想食日本野，又唔想食太貴，就上網搵左呢間餐廳試吓。一去到就有得坐，唔洗等位。餐廳嘅裝修新穎，有工業風格，啲椅子係汽油桶嘅樣，牆壁係貨櫃咁嘅裝飾，幾有特色。我地三個人坐左四人卡位，空間足夠，坐得舒適。同其他枱嘅距離足夠，出入唔怕撞到人。食物方面,我哋叫咗叉燒拉麵、只是叉燒烏冬,燒牛舌,芝士燒扇貝。飲品方面，我哋叫咗兩枝綠茶汽水，一枝蘋果梳打。叉燒拉麵賣相正常，湯底係豬骨，夠濃味，叉燒雖然唔係厚切，都唔會太薄，而且質地稔，又多舊。麵質啱啱好。芝士叉燒烏冬，賣相一般，有一塊芝士放喺烏冬面上。本來以為只係裝飾，會冇咩芝士味。但係湯底喜出望外，除咗有豬骨味之外，芝士味都係出乎意料之外地濃。叉燒嘅品質保持水準，好好味。串燒都有驚喜，燒牛舌好香黑椒味，質地啱啱好，爽口但咬得開。芝士燒扇貝同樣好勁芝士，裏面唔會好似一般放題食到嗰啲，好大pat沙律醬，比想像中好食。飲品方面，冇諗過賣相會咁靚，本身以為只係普通梳打。朋友就話綠茶味汽水其實唔係好重綠茶味，飲落都係汽水味為主。我叫嘅蘋果梳打味道正常。整體來講，服務良好，上菜速度快，食物有水準，價錢得宜，人均消費$100左右，性價比高。下次入元朗會考慮再去多次。…Read More

同朋友見到網上介紹粉紅色主題嘅餐廳，就特登過嚟試吓。餐廳係喺車房隔離，都要搵一陣先搵到，唔算好方便嘅地段。餐廳出邊已經見到裏面有唔少嘅打卡位同埋裝飾，好多粉紅色，少女心滿滿。雖然係平日，但係餐廳都有幾多客人，大多數都係好年輕嘅少女。因為多人，所以我哋被安排坐咗係一個相對起嚟冇咁多裝飾嘅位置。我同朋友都未食嘢，所以叫咗午餐，外加一杯嘢飲。食物方面，我叫咗All day breakfast，比想像中大份，而且味道唔錯。本身諗住餐廳賣點係打卡，預算食物會唔太好食，反而有驚喜。朋友叫咗三文魚意粉，意粉係粉紅色嘅，好靚，同時佢話味道都唔錯，正常，不過份量就一般，唔算好多。嘢飲方面，兩杯個賣相都好靚好啱打卡，我叫咗粉紅色拉花朱古力，朋友叫咗咖啡。朱古力嘅拉花好靚，朋友嘅咖啡都有貓咪圖案，好可愛。朱古力嘅味道正常，但咖啡就唔太有咖啡味，一般。餐廳提供左好多唔同嘅道具去影相，算係幾有特色同埋心思，但係有啲公仔就唔太乾淨，有啲灰塵。雖然影相睇唔出，但都建議時常清洗。整體來講，服務唔錯，食物質素正常，由於餐廳嘅賣點係打卡，所以依個價錢嘅食物我覺得可以接受。一個人大概消費$120，可以坐頗耐嘅時間。適合好好姊妹去食下午茶。…Read More

平日同朋友去深水埗，搵到依間餐廳，見幾有特色，就想去試吓。夜晚七點到去到餐廳，門口已經有好多人排緊隊，要攞籌。我哋兩個人等左10張枱左右先至入到去。餐廳門面裝修好有特色，有牌匾同埋摺門，一開始入去都係比個門面吸引左。餐廳裏面唔算多枱，大部份都係圓枱，所以兩個人嚟通常都要搭枱，我哋就要坐四人枱。空間唔多，我哋唔算叫咗好多嘢食，叫做同對面都仲有啲距離。另外，枱同枱之間走動嘅空間都比較少，可以容納到一個人。食物方面，因為天氣好熱，加上要喺門口等左好耐，冇咩胃口，所以我哋只係叫咗兩杯嘢飲，一個麵同一個小食。主菜叫咗叻沙，賣相好吸引，好多配菜，個湯酸酸地又辣辣地，好惹味。不過我哋唔太食得辣，食兩啖都已經滿頭大汗，越食越辣。雖然我哋都未去過馬來西亞，我朋友影相俾喺馬來西亞嘅朋友，佢都話好正宗。小食方面，我哋叫咗愛她愛他，係一啲魚肉，加上香料，用葉包住佢燒嘅一道菜。我個人唔太鍾意佢嘅質地，太軟熟，不過我同朋友都好鍾意佢嘅香茅味。飲品方面，我哋分別叫咗凍檸檬薏米水同埋凍白咖啡，薏米水一般，有檸檬味但係薏米比較硬，所以我都冇食晒佢哋。朋友好鍾意杯白咖啡，好香同甜。整體來講，服務尚算唔錯，侍應主動俾咗兩個碗仔比我哋，落左單都好快上菜，食物賣相同味道都有驚喜，好有特色同正宗。不過晚飯時間要等位，非繁忙時間嚟會比較好。兩個人食咗$141，平均一個人$70，覺得性價比高。…Read More

今日自己去開油麻地食晏，search openrice成日見到e間就嘗試下啦。未入到餐廳，經過走廊時好熱，好彩入去都夠冷氣。一入到去見到有幾多空枱下，我一個人坐既2人枱同隔離好近，大動作d都會整到隔離枱。我叫左lunch set，有餐包同湯送，叫左個牛排+薯條另外叫多左個凍薄荷朱古力。蒜蓉包個醬可以多d香草同蒜蓉，個醬唔夠多，所以味道比較淡。主菜賣相好靚，份量足，而且全部都熱辣辣。但係牛排既味道一般，好有鬆肉粉味，質地唔算稔（叫左6成熟），切開係靚既紅色，但都要有d力去咬。薯條外脆內軟，夠厚身，炸到岩岩好。沙律有黑醋，食落好甜，唔會覺得酸，對我來講幾好。薄荷朱古大夠大杯，賣相幾靚，好有薄荷味同朱右力味，成餐飯覺得最好味既野係佢。服務正常，就算坐好耐都唔會趕人走，lunch set連野飲加一$87，正常價錢。如果想搵個地方坐耐d，e到唔錯。…Read More

平日11點30到去左葵興食晏，kcc開左mos burger，見好耐無食過就去食下。印象中mos burger既漢堡包唔算貴，但比其他美式漢堡包連鎖店好食，所以都幾鍾意。兩個人叫左2個set A: 一個魚柳漢堡包同一個炸蝦漢堡包，set 就加20蚊有汽水同薯條。炸蝦漢堡包好多椰菜，而蝦餅裡面有1隻隻蝦，爽口彈牙，叫左他他醬，仲有wasabi 醬簡。薯條厚切超級正，新鮮熱辣炸好。佢地仲會提供膠兜，比人唧茄汁落去點，好貼心既安排。兩個人大概食左100蚊，食物水準依然保持到，性價比高。…Read More

平日晏就同朋友係天水圍搵食，好想食台灣野，就過左來e間試下。我地一入到去就有位，好彩早左少少去，午市都好full。餐廳環境裝修幾有特色，有一幅好大嘅壁畫，畫左九分十分火車站，係一個好打卡嘅地方。座位寬敞，坐得幾舒服，枱同枱之間空位足夠。我哋兩個人叫咗幾樣小食：忌廉芝士磨菇雞翼兩隻，台式烤香腸三條，櫻花蝦高麗菜煎蛋餅，一個主食：阿春麵線。其實份量好多，兩個人食都好飽，所以冇再叫其他主食。忌廉芝士磨菇雞翼炸到啱啱好，表面又脆又金黃色，上枱嘅時候好熱。雞翼裏面有濃郁嘅忌廉芝士，好好味，但係唔會覺得膩。份量方面，可以選擇兩隻或四隻，餐廳好貼心，就算少人都可以試到唔同嘅小食。雞翼餡料充足，好飽滿。台式烤香腸三條外脆內軟，平時其他台灣香腸好多食完都會好口渴，但係佢味道啱啱好。份量上同樣可以選擇兩條或三條。櫻花蝦高麗菜煎蛋餅份量好足夠，一人食半件其實都好飽。因為裏面好多餡料，有好多高麗菜，蘿蔔絲，蛋餅上面有好多櫻花蝦，加上有醬料嘅配合，味道濃郁，好適合一大班人開心share食。阿春麵線份量唔多，麵線唔會一夾就斷，味道好夠。另外叫咗兩杯嘢飲：榛果奶茶同巧克力奶茶，榛果奶茶好香榛子味，過得去。服務態度良好，侍應有禮貌，主動比碗仔我哋share食，食物份量比較大，兩個人食咗$166 ，人均消費80幾蚊，可以試到唔同嘅小食同飲品，性價比高，去開天水圍可以一試。…Read More

食飽飯搵甜品舖，成日經過都無食過，所以就去試下。去到門口有好多人等緊位，好彩都好快有得入去，可能兩個人唔洗等咁多張枱。環境衛生一般，一坐低發現枱仲有椰汁，而餐牌已經放左係上面，沾左好多汁。因為多人所以坐得好迫，要搭枱，大動作少少都會撞到人，會尷尬。兩個人叫左兩個綿綿冰，賣相唔好睇，一堆野咁，豆腐味上面有d好隨心唧既朱古力醬同彩針，對比色強烈，朱古力味就無咁大對比。兩個味道都還好，比較鍾意豆腐味，清甜dd，但兩個都無驚喜。…Read More

星期五去食晚飯，餐廳唔算大，入到去都有幾枱食客。因為book左，所以都係唔洗等位，入到去就可以坐低。餐廳裝修簡單，牆身有黑板寫左每日既特有既菜式，侍應服務幾好，會主動推介有咩好食，好有禮貌。我地叫左梅酒，串燒就有：牛舌，雞皮，芝士燒大啡菇，帆立貝，雞翼，油甘魚，主食就有：燒鰻魚飯。梅酒味道正常，夠凍。牛舌質感唔算稔，有d咬口，勝在燒得夠香，而且牛味足。雞皮好食，因為燒到脆卜卜，夠乾身，有朋友話過係香港少d會食到好食既雞皮，我覺得e個ok。芝士同菇配搭無得輸，食落菇好多汁，不過可以再多少少調味。單骨雞翼正，食落好方便，肉質嫩滑有汁，外表香脆，燒到焦焦地，好惹味。燒帆立貝味道鮮甜，但有dd煮老左咁。油甘魚比較重味，味道一般，唔算好有驚喜，同平時煎三文魚鰭味道差唔多。鰻魚飯份量一般，唔多鰻魚，味道正常。整體來說，價錢唔算平，不過居酒屋都唔會平，食物質素唔錯，而且服務態度好，想係荃灣搵個地方傾下計飲下酒都係幾好既選擇。…Read More

星期日晏晝去咗大圍食lunch，落大雨，餐廳位置唔近地鐵站，要行一段路先搵到。因為未到食lunch時間，冇咩人，一入到去就可以坐低。餐廳裝修唔錯，但係空間唔算大，枱同枱之間嘅空位可以再闊啲。兩個人坐左四人枱，所以都叫做舒適。兩個人叫咗兩個set lunch，叫咗燒汁牛柳粒燴意大利飯同龍蝦汁炸軟殼蟹燴意大利飯。每個set lunch包左一碗餐湯同一杯野飲，我哋叫咗cappuccino 同榛子咖啡。餐湯係洋蔥湯，賣相麻麻地，睇到好油膩，味道上唔錯，但因為油所以幾膩。牛柳粒意大利飯賣相一般，好在好味，有唔少牛柳粒，食落好香蒜味，幾惹味。龍蝦汁軟殼蟹意大利飯，味道冇牛柳粒意大利飯咁好，冇咁香口，但係都有驚喜，意大利飯好香龍蝦汁味，軟殼蟹雖然冇咩味，但炸到啱啱好，外皮脆內裏軟，熱辣辣。飲品方面，兩杯咖啡味道一般，不過不失，賣相可以再好啲。兩個lunch嘅份量都夠，食完好飽。服務態度良好，上菜速度快。整體來講，人均消費$68，喺假日食lunch算係性價比高。去開大圍可以一試。…Read More

平日去左同朋友食下午茶，行街行得攰，所以就想食下tea，見到e度個tea menu幾多選擇，而且唔貴，就入左去。環境幾舒適，樓底高，感覺好開揚，而且枱同枱之間有足夠空間，唔會覺得會同隔離痴好埋。叫左個朱古力蛋糕set，$68有埋野飲，叫左凍奶茶。件cake比想像中大件，食下午茶絕對夠曬，蛋糕上有一層超濃既朱古力醬，舖到好滑，好似鏡面咁好靚，裡面既蛋糕都好有朱古力味，不過覺得可以再鬆軟d。奶茶幾大杯，好多奶，我比較鍾意重茶味d既奶茶，好唔好飲就見仁見智啦。服務態度良好，上菜速度快，而且坐係到傾左好耐都唔會趕人走，性價比高。…Read More

平日13:30去食lunch，好多人，好彩朋友到先搵左位坐低，先有位坐。其實e間已經算多位同大間，不過都係幾迫，枱密密麻麻，所以行出行入都要小心d唔好撞到人。其實都係想食個快飯，叫左三文魚意粉set，本身叫左熱檬水，點知來左個espresso ，睇番張單先發現都係espresso，只好怪自已無睇清楚啦。意粉好一般，d汁感覺似罐頭汁，暖暖地，味道無特別。其實真心唔值$68，不過係又一城其實又無咩選擇，已經算平d。性價值唔高。…Read More

平日同朋友放工去食晚飯，6點幾7點左右，好彩有枱，一入去即刻有位坐。餐廳裝潢幾有feel，好有特色，牆上有塊大黑板寫果日有咩特別既菜式。只係店舖比較細，唔多枱，枱同枱之間好少空位，出入唔方便。我三個人叫左2個套餐，1枝啤酒，1杯奶茶。叫左傳統咖哩，橙咖哩，每個套餐都有酥油餅，白飯，沙律。傳統咖哩配魚，味道好正，叫左小辣，唔覺得辣，對於唔食得辣既人係好事。橙咖哩配雞，從來無食過橙咖哩，係其他地方食其他色既咖哩都覺得同普通咖哩無分別，諗住e度都會係。點知個味係完全唔同既，雖然其實個賣相兩碟差唔多一樣，但個味係有d似bbq醬，幾惹味同特別。因為佢同我地諗既唔同，我朋友就唔太鍾意，所以覺得都係好個人口味。唔太好既係份量唔算多，酥油餅得1塊，覺得可以多d酥油餅，少d飯，其實如果比我地簡1樣既話會好d，兩樣都食就濟左dd。沙律一般，味道正常。啤酒同奶茶味道都正常，唔係d咩特別野。服務態度良好，上茶速度快。3個人食左$260 左右，平均一個人食左$87左右，性價比普通，唔係話特別貴，而且食得飽。…Read More

星期日下午兩個人想搵cafe坐下，我地都好鍾意貓貓，所以決定再去阿貓地攤。對上一次去已經係4-5年前，e+除左係cafe外都有賣貓曲奇，其他小物，佈置都有d改變，感覺靚左同舒服左。我地一入去就有位坐，唔算多人，幾岩想靜靜地坐下既人，坐左4人枱近窗邊，有得望下街景，幾cozy。貓貓唔算多，好多都訓得好安穩，望下都覺得好治癒。其實同貓貓相處唔係一定要佢同你玩，所以我覺得可以同貓貓share同一個空間都已經好滿足～叫左兩杯野飲，有士多啤梨特飲同果茶，正確名唔記得啦，賣相好靚，少女心滿滿。果茶既茶壺同杯都好可愛，只係唔係好多。味道上不過不失，算唔錯。兩個人用左100到，性價比高，想搵個地方坐下傾下計，又想見到貓貓既人可以一去～…Read More