拉麵達人 (已結業)

是日收工約左朋友落旺角行街，行到肚餓朋友提議食拉麵，由於佢諗唔到有邊間好食，於是我就建議去呢間有少少距離既位於佐敦既拉麵店試下，因為見佢幾受好評！去到剛好唔駛等位，店員就安排左我地兩個人坐一張四人枱，雖然地方唔大，但店員都好細心問我地要唔要多張凳仔擺袋食得舒服D。坐定定之後睇下MENU先，由於我幾時都話食拉麵一定係個湯行先，所以雖然選擇好多仲樣樣都好似好正，我都係決定點左個W達人鰹魚豚骨湯拉麵(W取其DOUBLE意義，因湯底用了鰹魚及豚骨製造)，朋友就點左個配料多到滿瀉既櫻花蝦達人濃蝦醬油拉麵。係等待既時候，發現加點小食係有優惠，於是就加多左個唐揚炸雞。店內既裝修就一貫既日式小店風格，用左好多日式中古風既懷舊小飾物去做擺設，加埋埋一個一碗入魂既大牌扁，都幾特別。每張枱旁邊既牆上仲貼左句提示，話店內豚骨湯底係用大量豚骨製造，非常濃厚，如果想食稀D既湯就要同店員講聲，對濃湯極之入迷既我簡直係等到流口水！兩碗麵上枱，聞一聞果然不負我既期待，鰹魚豚骨湯既濃又香，飲落鰹魚味會慢慢散出黎，但又唔會完全蓋過豚骨既香味，簡直係絕配！至於朋友既濃蝦醬油湯底就係濃濃既櫻花蝦味，飲落又唔會太鹹，朋友話都唔錯