法式牛扒屋 (已結業)

對上一次嚟呢間餐廳已經三年幾前，印象好模糊，但近排興起食法式牛扒，於是嚟多次。 要咗Entrecote 碳燒肉眼扒，熟成medium，另加錢要龍蝦湯。 先上麵包籃係我喜愛的法包，暖暖地，外皮脆咬落去成枱都係碎😚，裡面鬆軟而且濕潤唔係乾爭爭，塗牛油好滿足。 龍蝦湯香氣四溢，飲落龍蝦味都幾濃郁又幾滑，不過冇龍蝦肉比咗冰鮮淡蝦，都okay。 主菜肉眼扒用澳洲牛，肉味略淡，但纖維唔粗又軟腍，成數拿捏幾準。個汁簡單用牛油香草煮成非常討好，又香又滑。薯條炸得略過火有啲乾，但薯味幾重。 甜品係栗子蛋糕，帶淡淡栗子味，普普通通。 咖啡應是French Roast，濃厚帶微澀，落完coffee cream又覺得啱啱好。 雖然嘢食唔係食過最好嘅一間，但置身响好似一個舊西餐廳咁，用紅白格子布，地下用啲舊式細格階磚，全程聽住好輕鬆嘅Jazz風格歌曲，侍應服務非常到位兼主動，適當時候加水、話你知甜品係乜、問咗你係咪食完畢先收碟、問你要咩餐飲，速度控制得好啱，感覺又幾舒適愜意。