你食pizza maru當然要食pizza同炸雞，佢哋嘅Pizza有好多唔同嘅選料配搭，有韓式有西式，我自己就偏好西式芝加哥Pizza，諗起厚厚嘅芝士就已經流晒口水啦！
我哋叫咗太陽蕃茄芝加哥，配料非常豐富，有雙倍Mozzarella cheese、芝士條、巴馬臣芝士、辣肉腸、蕃茄等。揀得芝加哥Pizza，除咗食配料，重點亦都係勁多芝士嘅餅皮，同埋超級好味多芝士嘅Pizza邊。拎起個Pizza好容易就做到拉芝嘅效果，同出面嘅Pizza舖比較，呢個真係好食好多倍。
韓式炸雞都係呢度必叫嘅食品，今次我哋試首爾醬油咖喱粉炸雞，貪佢夠特別。呢度啲雞都大大件，六件雞都夠幾個人食。炸雞當然炸得夠脆夠香，另外加埋醬油味同咖喱粉，味道就更想一層樓，咖喱粉唔會過多搶咗炸雞原本嘅香味，反之仲令佢嘅味道多一層層次。
由於好想食海鮮，我哋仲叫咗個漁夫蕃茄會海鮮，呢個海鮮仲配埋脆包，海鮮有大蝦、青口、帶子、魷魚，都幾豐富，海鮮全部都新鮮好味大大隻。呢個菜色令人喜出望外嘅地方係佢嘅醬汁調校得非常好味，唔單止用來點脆包一流，海鮮加埋呢隻醬都非常好味，我哋將大大兜嘅醬汁都食清光，真誇張。
飲品叫咗pineapple ade, 味道都幾清新，唔錯唔錯。
