梨滿園韓國料理 (已結業)

去到旺角，乜都有得食。見做完運動，要獎勵下自己。就試下近金雞既梨滿園。基本野韓燒，小炒當然有。但講明獎勵自己，韓啤+炸雞當然係主打。韓國炸雞要整得好食一啲都唔易，唔可以淨係靠味粉，醬料同雞肉鮮嫩程度相當重要。一坐低，事頭婆已經熱情推介芝士同甜辣醬炸雞，而且講明要等一陣，因為要新鮮炸。結果證明係值得等待。甜辣醬炸雞皮脆醬汁香濃，雞肉線條分明，鎖住肉汁。芝士炸雞香味極濃，啖啖都有噗鼻既芝士味。一個人都食左六七舊，唔夠喉，事頭婆話不如試埋個蜜糖同醬油。就俾個機會佢。蜜糖好適合又怕辣又想過燒烤癮既人，醬油就比較特別，有啲似脆皮炸鼓油雞。最後唔飲埋個辣豆腐湯點可以總結呢餐韓國炸雞。辣味係來自傳統泡菜湯，加埋豆腐同雞蛋就啱曬我呢啲怕熱氣又鐘意食煎炸野既人。食完感覺冇其他炸雞咁熱氣，又有傳統韓國味。值得一讚係事頭婆服務態度非常專業，全場坐爆人都用心介紹各款特別菜式。食得舒服，服務亦一流，下次去旺角唔使再揀其他餐廳。