今日無太多時間周圍影相，所以簡單講講野食。野食全部係門口範圍，自成一國。
刺身已經切好，唔洗排隊等切，而且有平時少見既刺身，例如赤貝，馬刀貝，甜蝦，質素都好新鮮爽脆同鮮甜，另外都有三文魚，吞拿魚，墨魚同八爪魚。吞拿魚質素都唔錯，而且係厚切。
凍海鮮我就無食啦，我見有麵包蟹，鮮蝦，螺等等。
呢度熱食既賣點肯定係大大塊花膠同大大件龍躉球。花膠算唔薄，我食左3塊。龍躉球非常大件，而且皮有彈性而肉質非常彈牙，我食左好幾舊！另外有北京烤鴨，專人幫你包埋皮同配料，唔知可唔可以只要皮。仲有乳鴿同鷄。
燒牛扒好正，又淋又嫩，肉質好好，加埋蘑菇汁一齊食仲正，我食左兩塊。另外都有其他醬汁。配有少見既煙肉椰菜仔，車厘茄，薯角同薯餅自己攞。燒牛扒隔離有少少西式野食，牛面頰非常嫩口！另外我見到有腸，魚柳同意粉，就普普通通唔吸引。
其他熱食就唔太特別，有西芹蝦仁，鵝掌，蒜蓉蒸蝦，菜心，肉碎四季豆，燒賣，炒麵。蝦仁非常爽脆。另外有一個小小既咖喱角落。仲有粉麵檔。
湯至少見到有兩款，有中有西。
沙律選擇唔多，有燈籠椒，西芹，紅蘿蔔，沙律菜，紅菜頭，薯仔沙律，番茄配水牛芝士。附近有3款芝士，凍肉得煙三文魚。沙律質素正常。紅菜頭好酸。
3
甜品有Raspberry Roll, Chocolate Cake, Puff, Macaron, Champagne Jelly, Panna Cotta, Tiramisu, 仲有專人幫你切既pineapple cake, cheese cake, chocolate tart, black forest cake, mousse cake等等。中式甜品有綠豆沙，蓮蓉西米布甸，麵包布甸，蛋撻仔等等。甜品質素參差，cheese cake非常滑溜香濃，蓮蓉西米布甸又香又滑，蛋撻仔唔甜有蛋香。不過Raspberry Roll無Raspberry味，卷蛋質素都麻麻，Pineapple cake先有菠蘿味。Panna Cotta普通，Chocolate Cake都好普通偏硬。Puff都係中下貨色。Macaron想食不過未有添加。雪糕係哈根大師雪糕杯，例牌個幾款口味，包括我最愛既士多啤梨口味。
水果有西瓜，哈密瓜，提子同蘋果。西瓜質素中下。哈密瓜可以。提子同蘋果無試。
每人包一杯咖啡或茶。我叫左熱檸水。
總括而言，食物選擇真心唔算多，個人覺得呢度主打刺身同花膠龍躉。食物質素普遍都可以，甜品有點失望。服務員都快手收碟添水。環境方面都幾嘈，多人一枱會講野聽得唔太清楚。今日我唔知價，不過正價聽講要四百多一個人，都唔平，勉强比個OK啦。
