1988 (已結業)

今晚又去觀塘搵個朋友食飯。 今日冇乜心水想食乜 ，都係等個朋友話事。佢帶咗我去工業區裏面嘅工廠大廈去試一間泰式加少少fusion既餐廳。佢喺觀塘返工成日捐窿捐罅試過好多唔同嘅食肆，你叫我自己搵可能未必會搵到嚟呢度。我哋兩條友坐低咗但我又唔係太肚餓，所以都係叫咗一個沙律 ，一個pad Thai再加幾串串燒。估唔到喺工廠大廈裏面嘅fusion餐廳都有啲驚喜。我哋叫嘅係軟殼蟹沙律, 泰式沙律一向帶少少辣佢都唔例外。但係佢嘅辣度啱啱好再加上青芒果嘅酸味同埋特別調製嘅醬汁非常之惹味! 軟殼蟹亦都炸得啱啱好同埋唔油腻。個pad thai炒得好乾爽，一啲油都冇。配上幾隻非常之爽口嘅大蝦令到碟炒金邊粉非常之有水準。佢嘅串燒亦都值得一讚!我哋叫咗燒雞肉串同埋豬肉串。燒得好甘香不在話下，最難得嘅係裏面啲肉汁保留得好好。 再加上佢特製嘅沙爹酱，一口咬落去肉連汁嗰種感覺，冇得頂!!最後我個朋友叫咗個甜品,係佢哋好出名嘅蜜糖撻 配新鮮西柚啫喱。根據我朋友嘅描述佢覺得個甜品有大酒店西餐廳嘅水準。而最令人讚賞嘅就係佢嗰隻西柚味，佢係外面試咁多甜品都未試過咁有特色而好味。總括嚟講呢間餐廳嘅食物有水準而性價比亦都高。