和牛燒肉一郎 (寶漢大廈) (已結業)

自從晚市冇得堂食已經好耐冇食韓燒，今日經過銅鑼灣，決定試一試和牛燒肉一郞嘅午市放題！燒肉放題有6個餐可以揀，價錢由3百幾到1千幾都有，價錢越高選擇越多，啱晒唔同要求嘅你。今次叫咗Course B，都有成64種食物可以任叫，性價比幾高。餐廳大部分都採用手機點餐，另有沙律吧、甜品區同飲品區。飲品區除咗罐裝飲品，仲有大量自家製嘅特飲。仲未落單，店員已經將一隻燒肉拼盤船送上，豬、牛、雞、菜、海鮮每樣有啲，可以先試下邊款啱心水。個人推薦蝦同帆立貝，兩款海鮮都非常新鮮，蝦爽口鮮甜，帆立貝大粒厚身。肉類方面個人喜歡佢特製嘅壺漬牛肋肉，採用特色嘅醬汁醃製，同牛肋肉非常配襯。熟食方面亦有唔少選擇，蛋花湯、冷麵、石頭飯等等嘅特色韓式一應俱全。