今日同老公撐枱腳，去咗旺角豉油街一間樓上壽喜燒店，一入去就覺得環境好舒服，裝修走高端路線，枱與枱之間有空位，坐得唔逼~店員服務態度十分好，由帶位到介紹菜式都好細心，抵讚！
我哋叫咗個二人餐，再加幾串串燒試吓。個餐主打特選鹿兒島黑毛和牛A5級，一上枱就見到啲雪花分布好靚，好似藝術品咁！店員會幫手燒，問清楚你鍾意幾成熟，確保每塊肉都保持最嫩滑嘅狀態。牛肉一入口，油脂香即刻爆發，點埋日本蘭王蛋漿，又滑又濃郁，真係「冇得頂」！
套餐嘅蔬菜籃都好新鮮，吸收晒壽喜燒汁嘅甜味，煮耐啲都唔會爛。澱粉有真打稻庭烏冬同日本米飯，烏冬滑溜，米飯香糯，撈汁食真係飽到上心口！
串燒方面叫咗四款：紫蘇雞肉、雞腎、牛舌心同五花腩。用炭燒爐仔上枱，保溫得好好，尤其係牛舌心，爽口得嚟又唔韌，燒得啱啱好！至於飲品，我哋試咗青之海同熱情林檎，兩杯都偏向清新，層次分明，解膩一流。
成餐飯食落好滿足，如果係生日或者慶祝紀念日，呢度絕對係不錯嘅選擇。店員服務貼心，由頭幫你燒到尾，可以專心同身邊人傾偈，享受美食。下次再嚟旺角，一定會再食～
1
1
