華小料理屋 (已結業)

辛苦咗一個星期，終於嚟到Happy Friday啦，梗係要搵啲好野食，嚟獎勵吓自己架啦！今日就揀咗位於金朝陽中心嘅華小料理屋(Hana)啦！Hana嘅lunch set有好多選擇，有壽司魚生，亦有燒魚，天婦羅等熟食！但Hana係出名食和牛嘅，咁梗係要試吓啦！我就揀咗A3和牛壽喜燒啦！個套餐有前菜、沙律、蒸蛋同麵豉湯！啲沙律菜好新鮮！啲蒸蛋好滑，不過味道略淡！蒸蛋面上加咗柚子，有少少奇怪！個牛鍋啲和牛好嫩，有少少入口即溶嘅感覺！入面啲菜好甜，吸晒個湯啲味，好好味！之後仲有嫩滑奶凍，味道唔算甜，好滑好好味！另外套餐仲包飲品！呢個餐好好味，啲牛真係好好食！下次試吓其他牛嘅煮法先！