7
任撈生猛海鮮區
最吸引絕對係120分鐘任食即撈海鮮！餐廳設有一個魚缸，入面有生猛大頭蝦、蟹、鮑魚、蜆同東風螺，全部識郁兼活躍。尤其大頭蝦隨時會跳彈逃走，隔離枱嘅客人就嚇到尖叫。大頭蝦肉質彈牙，鮑魚爽口有嚼勁，蜆同蟹都鮮甜冇沙，簡單淥一淥就已經足夠鮮味。
招牌湯底花膠雞鍋
湯底選擇唔算太多，不過有齊經典麻辣、番茄、大骨湯同菌菇鍋等。今次試咗招牌花膠雞鍋，湯色金黃，雞肉的鮮味與花膠的滑潤完全融入湯中，仲加咗蟲草花同紅棗，飲落滋補順喉。極力推薦加份竹笙，吸滿湯汁之後超級正！
多款肉類+罕見內臟任點
掃碼點餐有大量選擇，除咗自助區海鮮，仲有原條紅衫魚、鯧魚、生蠔同海參等，呢啲喺其他火鍋店較少見。生蠔肥美鮮甜，海參爽滑。肉類方面有美國安格斯肩胛肥牛、新西蘭小肥羊同荷蘭五花腩片等，切得薄身，油花均勻，涮幾秒就食得。仲有鮮鵝腸、豬黃喉、豬腦、雞子等內臟款式，適合鍾意試特別配料嘅朋友。
熟食+蔬菜丸類應有盡有
自助區有熟食如麻辣羊肉串、豬手、辣魚肉同炸物，甚至烤榴槤都有！蔬菜區提供多款新鮮蔬菜如生菜、娃娃菜、白蘿蔔，仲有丸類、烏冬、響鈴等，選擇豐富。菌類同海藻類款式也多，健康又清爽。
甜品飲品任食任飲
飲品櫃有汽水、涼茶、冷泡茶同啤酒，最驚喜係椰青水任飲！甜品方面有少量選擇，但以火鍋放題來說已經合格。
免加一兼有時段折扣
中小學生同長者有9折，5歲以下小童免費。生日訂餐可享88折，晚上10點後入座同樣有88折，營業至凌晨3點，最重要係免加一，確實抵食。
