佳記雞煲小廚 (已結業)

朋友一向鍾意食雞煲，比佢搵到佳記雞煲可以無限加雞，即刻要黎試下啦。＄168一位全包了，無醬料費，無加一，可以食兩個鐘，嘩，抵到爛呀！無限加雞，啤酒汽水任飲！送小食一款，可以揀手拍青瓜可尖椒皮蛋，我地揀左青瓜，酸酸辣辣幾開胃。雞煲都有幾款，卜卜蜆雞煲，豬手雞煲等，我地揀左最踏實嘅佳記招牌雞煲，第一次食試下佢嘅招牌先啦。口味則揀了小麻小辣，噢噢…好香啊！雞件入晒味，辣辣地好惹味呀，太正了我地加左三轉雞。食完雞可以打邊爐，牛肉片同豬肉片質素唔差喎，無白色一片，哈哈。肉味一般啦，個雞煲汁咁濃其實無所謂了。其他火鍋料，蓮藕同蘿蔔吸晒雞煲汁超正呀！仲有響鈴超邪惡，吸完汁成條鮮竹卷咁，好味好味。炸魚皮又係好正，點完雞煲汁簡直提升十倍好味度。點都要食下菜嘅，點左生菜。開頭黎個雞煲仲諗點解咁多汁，原來呢度係直接用個雞煲汁打邊爐，超級濃味亦十分好味，加入蔬菜出番啲水中和下，又辣又鮮呢個湯底無得彈，哈哈，怕太濃都可以要求加湯，個人就鍾意無水版啦！店內提供烏龍茶，獅威啤酒，椰子汁飲品，各式汽水等任飲，如果真係唔啱飲，都有白開水提供嘅。一個字，抵！唔怪得平日晚都咁多人等位。