村爺爺車仔麵 (已搬遷) 新店位置

龍蝦加車仔麵呢碗村爺爺車仔麵真係做得好出色，先唔講佢嘅特式龍蝦湯底同埋伊面，佢普通嘅餸都煮得比其他車仔麵嘅好味，我叫咗三個餸，三個餸都好正！最喜出望外嘅係豬腸，普通一條豬腸周街都有得食，佢呢一條比較肥大，咬落去好有口感，比一般的比較厚身，會粗一些。其次就係冬菇，冬菇好厚，但係食落去好淋，佢應該浸左一段時間先有咁嘅效果，另外仲有陣陣嘅香菇味，不錯。仲有就係牛筋，呢一間唔會話好淋好淋，食落去會有返啲口感，都要咬兩咬先可以吞。份量都幾多下。當然，重點要講一講佢哋鋪頭推薦嘅龍蝦湯底，竟然有半隻龍蝦隨着車仔麵附上，真係第一次食車仔麵都可以有龍蝦入邊，服務員仲好窩心咁俾埋個鉗我哋，可以鉗爆啲龍蝦殻，龍蝦食落去都幾彈牙下，唔會話好縮水，以呢個價錢絕對係超值，湯底更加唔使講，差唔多比我飲晒咁滯，因為真係好好味，好重龍蝦味，會令你不停飲不停飲，好好味啊！