丼瀛 (已結業)

之前Honey膝頭哥韌帶扭親，要去佐敦睇跌打敷藥，今日係最後一次覆診，師父話無事㗎喇，包保行得走得，生蝦咁跳都得。從醫館返出來，經過廟街，Honey話食埋嘢先返歸。一直行多幾步，就見到間新嘢，專食丼，一於去食。坐正對住廟街嘅座位，餐廳唔算大，不過就有幅好靚嘅牆畫。 餐具都幾精緻。餐牌有兩版。既然師父話Honey 可以生蝦咁跳，我哋就食個至豪嘅龍蝦刺身爆丼$268，再食多個羽衣甘藍無花果黑醋沙律$78。【麵豉湯】跟餐附送的。一般的日式餐廳的麵豉湯都較鹹，這個味道適中。【羽衣甘藍無花果黑醋沙律】賣相好靚，各款食材放埋一齊，好襯。黑醋汁竟然可以凝結成珠粒附在羽衣甘藍之上，這個是什麼物理現象呢?無花果生食都係第一次，原來係好腍，好鮮甜。藍莓新鮮，爆汁，好甜。【龍蝦刺身爆丼】有兩層。上層放滿魚生、一大隻龍蝦和開邊流心蛋，咁多材料砌在碗丼之上，相信廚師要花一點功夫才辦到。下層是蒟蒻沾麵和海膽芝士汁。等我慢慢將個龍蝦剌身爆丼拆解先。好食到不得了。龍蝦頭有好多糕喔，極邪惡，but I like it!用蒟蒻來做成麵條，我都係第一次見，蘸上海膽芝士汁來食，真係一絕。個汁真係無花假，有好多海膽。正呀!