廟街冰室 (已結業)

之前見唔少人盛讚廟街冰室嘅叉燒，就嚟咗試佢哋廚師推介——黯然銷魂飯啦。都唔轉彎抹角，個飯真係唔得。😨 黯然銷魂飯 $58碟飯嚟到我面前嘅時候，真心嚇咗一跳。影呢張相嘅時候我已經執過吓啲食物嘅擺位。一直都好想講，黯然銷魂飯唔係等於叉燒煎蛋飯，黯然銷魂飯之所以黯然同銷魂，係因為會食到家燕姐暈低咗都再流眼淚，流眼淚係因為加咗洋蔥。成碟飯都無洋蔥，又點黯然？點銷魂？好，入正題。啲叉燒真心世界級，厚度平均每塊1-2mm，師傅刀功真係一絕。本身已經係嚡口嘅瘦叉燒，再薄切再燒真係搞唔掂，有幾塊直頭係乾柴到燒燶煙肉咁，以為食緊嘅係豬肉乾同豬肉紙。煎蛋有兩隻，係熱辣辣嘅，但無得篤爆佢流啲蛋黃落啲飯度，已經敗北。幾棵白菜仔好爽口，煮淋啲會更好。最後都有要讚嘅地方，就係個甜豉油幾香口。