發哥粥底海鮮火鍋 (已結業)

今日約咗人喺九龍灣交收， 順便問下喺附近做嘢嘅老友一齊飯聚， 行下行下見到呢間粥底海鮮火鍋， 兩條友咪走去試下囉。嘢都未叫阿姐就放低一支竹蔗茅根， 之後送咗一碟手拍青瓜同凍嘅雞腳， 仲要送多一碟焗嘅蒜蓉青口。 我真係冇諗到有咁多前菜， 之後仲要送上一盅燉湯， 十分足料係雞腳燉花膠，正。我叫咗一個龍蝦餐，裏面已經有不同嘅海鮮， 蟶子， 鮑魚 ，蚌貴妃 ，蚌蜆， 海蝦， 魚， 重送咗一碟肥牛同埋可以揀八款 火鍋料， 分量相當之多。海鮮盤嘅海鮮樣樣都好高質， 真係冇得彈，樣樣都係好新鮮彈牙， 只要係新鮮嘅唔駛特別多調味已經好好食。 呢個餐我反而想介紹呢嚿魚， 叫做多寶魚， 喺街市都好難買到， 佢係扁身好似一隻碟咁嘅， 食落去相當嫩滑 而且冇乜骨。手打丸我就推介墨魚丸， 隱約食到細細粒嘅墨魚，非常彈牙。食到尾個粥底會加入返南瓜，芋頭，同埋蔥 菜譜，有曬海鮮嘅精華， 十分正。