Sky726

今晚約左朋友收工食好西，餐廳為於旺角彌敦道，近地鐵站，十分方便。餐廳雖然唔算好大，但裝修擺設都幾用心，幾靚，中間係一個吧台位。因為想試下佢既鵝肝，而朋友亦想試cocktail，所以我地今次無叫set，選擇左散叫。鵝肝size唔大，但其實兩個人分份量都ok。鵝肝口感超滑，0腥味，本身已經好香。再加埋佢有一層薄薄，咬落有啲似焦糖既面，令到成件事變得更香。底下有啲類似脆米既野，多左一份香脆既口感。美國安格斯肉眼煎得超香，肉質相對淋身。我地叫左5成熟，餐廳煎得偏熟左少少，但係肉質，肉味，肉汁方面都好好，值得推薦。底下既露筍份量好多，而且好嫩無渣。薯蓉好滑，奶香味重，好食。羊架可選4支或6支骨，我地就揀左4支。羊架唔膻，同樣地都煎得好香，但亦都同樣地略嫌熟左少少，肉質比較實淨。配菜同牛扒既一樣。朋友點左一杯Godiva Delight，賣相幾精緻。聽朋友講，酒味唔算太重，朱古力味同baileys既味都好出，仲帶少少橙既香味。咁sweet既味道推薦比咁多位女士～仲好適合聖誕節飲添！