六十六十火鍋 (已結業)

想食呢間六十六十火鍋店好耐，雖然只係開業半年，但係有幾次晚上繁忙時間經過都見好多人等位， 人氣咁旺心諗一定要搵次嚟幫襯，擇日不如撞日就今日放工後同朋友去試下。我哋揀蕃茄湯底， 200蚊有八款海鮮同六款火鍋配料， 兩人份量都算好多，平過街市買， 又唔使自己整餐懵， 難怪而家咁多人鍾意出街食飯。海鮮有我哋最鍾意的肉蟹，大隻又新鮮，朋友講笑話淨係食個蟹都已經飽飽地添， 蟹肉浸落個湯度超級鮮甜。新鮮鮑魚， 真的超級大隻， 口感紮實彈牙有嚼勁， 但千祈不要淥得太耐，如果唔係變靭就唔好食啦。貝類，蠔仔同鮮魷魚仔，份量頗多，蠔仔雖然細粒咗啲， 但洗得好乾淨，食落唔腥都ok， 魷魚仔非常新鮮， 肉質爽口彈牙味道唔錯。火鍋配料有二十幾款選擇， 之前食咗咁多海鮮，都已經飽飽哋，所以我們冇點咁多肉類， 整體食物質素可以， 最正當然係美國肥牛， 肉味夠濃入口溶化， 滾兩滾就食得 ，打邊爐一定唔少得。最後食埋呢個脆卜卜嘅油渣脆米泡飯， 湯底嘅精華所在， 簡直完美。