吉壽日本料理 (已結業)

食過幾次放題，覺得旺角胡社生行5樓嘅吉壽日本料理值得再去食。除左地方够大，大部分係軟淋淋梳化位，坐得舒服外，食物質素高，款式又多，而且上菜速度又快，又冇漏單。食物款式多籮籮，嚟多幾轉都未試完。場內設有沙律、甜品、飲品、清酒/梅酒、雪糕等多個自助區。飲品雪糕款式之多可以同士多睇齊。西京比目魚肉質嫩滑，最適合我愛魚但又怕有骨嘅為食😻。香草紐西蘭羊鞍肉質甘腴嫩滑，加入檸檬汁，可去羊羶味。蒲燒鰻魚香甜肥美，有種入口即溶感覺。鐵板大赤蝦鮮甜，厚肉彈牙。手卷內嘅飯糰細細舊，吾驚太飽食吾到其他嘢，最愛海膽夠份量。壽司件件新鮮，黑松露夠矜貴， 配搭赤蝦壽司又香又好味。花之戀同千島吉列大蝦卷顏色突出，三文魚油甘鮮滑，魚籽脆卜卜 。口感一流！刺身夠冰鎮新鮮，最回味希靈魚有蟹籽般爽脆嘅口感。最後食埋雪糕加熱飲，百份百滿足感。服務佳，有保證，值得推介。