添福小食 (已結業)

早前睇港台節目介紹時新，忽然記起之前幫襯過嘅添福小食，兩間都係賣港式漢堡嘅名店，兩間都係良心小店。添福喺運動初期就表態話唔做黑警生意，結果畀藍屍猛烈攻擊，之後當然又畀黃絲瘋狂懲罰，所以有一陣子生意好到不得了，日日大排長龍。我會用 “三顧草廬” 嚟形容幫襯添福嘅遭遇：第一次晏晝點幾鐘嚟到佢未開門；第二次傍晚六點幾七點鐘嚟到，所有漢堡包類都已經賣哂😂，結果剩係食咗隻熱狗；第三次六點鐘嚟到，終於食到。我叫咗個芝士黑椒牛肉漢堡，餡料有手打黑椒牛肉漢堡扒，芝士同茄汁，雖然簡單，但係質素頗高，塊牛肉漢堡非常厚，兩邊煎得少少燶少少脆好香口，入面嘅肉質卻估唔到咁 juicy。肉味方面，廿零蚊個包當然唔可以同高價美式漢堡相比，但係以港式漢堡嚟講算係數一數二👍。另一樣令我印象好深刻嘅係佢哋張號碼籌，背面印咗天琦嘅肖像同金句：我懇請你們不要被仇恨支配自己，在危難中，仍要時刻保持警覺與思考。號碼籌拎喺手中，百般滋味在心頭。