滿粥順德粥底海鮮火鍋

營業中

休息中

鍾意食粥底火鍋嘅朋友一定唔可以錯過，呢間餐廳嘅海鮮絕無欺場，大大份之餘又好新鮮。有招牌孖寶餐、龍蝦餐同肉蟹餐，中間價位可以試到新鮮海鮮，性價比都幾高🦀🦞今次我哋揀咗肉蟹餐($198)，套餐豐富，已經包咗7款時令海鮮、6款自選火鍋配料、3款粥底配料、仲有我哋最期待嘅海鮮粥！時令海鮮有沙白、蜆、鮑魚、大肉蟹、基圍蝦同魚、沙白。餐廳好貼心，有教客人每款海鮮需要烹調嘅時間，等啲海鮮唔會過熟，又保持到鮮味。鮑魚同基圍蝦好新鮮，上枱嗰陣仲會郁。沙白同蜆類份量都唔少，煮一陣已經全部開晒，一啲沙都冇。最有驚喜嘅係大肉蟹，蟹肉新鮮實淨，仲有啲蟹膏添😍火鍋配料選擇都唔少，有肉類、餃子類、丸類、雜類同菜類。美國肥牛同豚肉片份量都唔少，冇雪藏味，肥牛仲有啲油脂味，正！估唔到餐廳有養顏花膠，好新鮮同爽口，花膠索晒海鮮嘅味道，好入味。食到差唔多，就可以倒埋粥底配料入個煲到，有粟米、南瓜粒同芋頭粒。店員會過嚟幫我哋加米，配埋菜脯同蛋汁去煮粥，啲粥吸收晒海鮮嘅精華，超級鮮甜，絕對係成餐飯嘅精髓😍滿粥順德粥底海鮮火鍋 📍大角咀杉樹街2-16號金基大廈地下G7號舖