宮崎肉本舖 (已結業)

話說呢一間燒肉店，其實一直都係我嘅口袋名單入邊，每一次喺銅鑼灣行街都好想試吓，但係仲係未有機會，今次約咗同朋友食lunch就去試吓！呢間餐廳主打係日本和牛，佢哋使用九州宮崎直送嘅櫻花牛作為佢哋嘅主打肉品。佢嘅風景亦都好靚，窗口係對住維多利亞公園，食飯對住呢個景色，絕對係心曠神怡。今次我哋專門試佢嘅午市定食，包括喺本舖A5和牛三寶盛合，同埋A5和牛咖喱蛋包飯定食。佢哋嘅本舖A5和牛三寶盛合用上三款牛肉，包括牛肋肉，牛後腿肉同埋牛肩肉。只需輕輕烤熟兩邊就已經可以食得。牛肉香味好濃郁，而且因為油花豐富嘅關係有入口即溶嘅感覺，配合返白飯簡直係天衣無縫！牛咖喱蛋包飯定食我覺得都好好食，佢嘅牛肉燉得好鬆軟，入口輕鬆就咬開咗，而且配合返日本傳統嘅咖喱汁同埋香滑嘅雞蛋，絕對令你嘅味蕾變得豐富。配菜方面我自己都覺得質素好好，凍豆腐上面嘅肉碎勁香，配合返滑溜嘅豆腐絕對相得益彰。麵豉湯方面都好出色，比一般外間飲到嘅冇咁鹹之餘，亦都好濃郁，我自己都飲晒！總括嚟講我覺得呢間餐廳真係質素好高，如果午市過嚟食嘅話絕對係CP值之選，大家如果去開銅鑼灣嘅話，記得要試吓！