大一海鮮火鍋料理 (已搬遷) 新店位置

天氣轉涼約朋友食飯自然就會提議去打邊爐，見呢間湯底都幾特別所以去試試。首先我地叫左野菌黑松露湯鍋，一上枱已經聞到好香黑松露味，我哋試一試佢啖湯真係不得了，好香口好濃郁但又唔會太鹹之後我地叫咗手切安格斯肥牛、芝味響鈴、鮮打海蝦丸、黑松露帶子餃、蘿蔔同蔬菜拼盤。安格斯肥牛（大）- 牛肉厚度適中，雪花均勻，食落有牛味又唔韌。芝味響鈴 - 其實只係喺響鈴上面灑左少少芝士粉，所以當浸落湯底後芝士粉已經冇晒，食時冇芝士味。鮮打海蝦丸 - 同出面買啲丸好唔同，食得出係自家打，食落有蝦味同好彈牙。黑松露帶子餃- 真材實料，食到帶子粒。餃子本身淡淡嘅黑松露味配上黑松露湯底簡直係絕配。最後蘿蔔索晒啲黑松露湯底真係好好味。蔬菜拼盤都好抵食，份量好多同最重要乾淨新鮮。總括黎講，雖然價錢貴左少少但食物質素都值得，同朋友都諗可以encore 。同埋要讚下佢個鍋，d湯蒸發得好慢所以我哋只係加左一次水，食到最後個湯都可以keep 住濃。