128
3
0
港鐵尖沙咀/尖東站 N2 出口, 步行約3分鐘 繼續閱讀
電話號碼
28896986
營業時間
今日營業
17:30 - 02:30
星期一至日
17:30 - 02:30
付款方式
Visa Master AE 現金 銀聯
座位數目
140
其他資料
Wi-Fi
深夜營業
酒精飲品
VIP房
泊車 詳細介紹
電話訂座
加一服務費
當面支付
食評 (135)
等級6 2017-11-26
5294 瀏覽
幾個由小學已經認識的朋友,數數手指已經接近40年,雖然現在各有各忙,但每隔兩三個月總會找個藉口碰頭吹水食餐飯,今次就揀了「大一海鮮火鍋料理」。近年開業的火鍋店裝修越來越骨子,可以選擇的火鍋配料也由以往的牛肉、羊肉、鯇魚腩 / 鱔片、各類餃 / 丸,升級至手切本地牛頸脊(近十幾年本地牛肉越賣越貴,靚牛頸脊價錢直逼、甚至貴過頂級美國安格斯牛肉)、和牛、各款游水海鮮,當然游水海鮮全部都是時價。是晚星期五,整間火鍋店座無虛席,裝修唔算豪華、但乾淨企理(講到靚裝修港式火鍋店,可以參見另一篇食評「豪食涮涮鍋」),只不過比較擠迫、樓底又唔夠高、環境又有啲嘈吵,可以的話,盡量揀靠近窗邊的四至六人卡座最理想。火鍋醬料款式的選擇唔算多,鍾意搞混醬的人會唔多滿足,但對於只要求豉油、辣椒、炸蒜蓉及XO醬的筆者已經非常足夠了。尚未齊人,先叫兩個香口小吃制五臟廟。椒鹽魚腐($69)椒鹽豆腐、椒鹽九肚魚食得多,椒鹽魚腐第一次。魚腐即是魚肉膠混入豆腐蓉,然後吱成一粒粒,平常在魚蛋粉麵舖的魚腐都是蒸熟後再稍為炸香表面,然後放湯;面前這一碟炸魚腐其貌不揚,很懷疑是否好食。每一塊炸魚腐形狀不規則、表面完全陷下去,最貼切的形容就是一個洩了氣的氣球;唔知道係醃料原因抑或炸過了火,顔色金黃得來帶點瘀黑。總之,賣相輸哂。食落去卻是另一回事。由於新鮮熱辣辣油炸,魚腐本身又非常容易吸油,再加上上菜速度夠快,每一啖咬下去非常燙口。表皮香口得來有一點點煙韌,就好似炸鯪魚球的質感;中心卻非常腍滑(源自豆腐)、又有少少爽口(源自魚肉膠),加上濃濃的鹹鮮以及表皮的香口惹味椒鹽,估唔到幾好食。相比之下,脆炸墨魚雲吞角($69)就被比下去了。望落去有啲似炸雲吞,只不過食起上嚟雲吞皮脆得來很硬、唔夠鬆脆,明顯係雲吞皮太厚、唔夠薄。餡料方面捨棄鮮蝦、改用墨魚膠,原意係想搞搞新意思,只不過缺少了鮮蝦的鮮甜,只餘下墨魚膠的爽口彈牙,加上墨魚膠只有一小粒,份量唔夠多,及不上傳統的炸鮮蝦雲吞好吃。墨魚膠還是製造成墨魚丸烚下烚下或者炮製煎墨魚餅更為合適。古月龍山醉雞鍋(全隻)($189)半隻雞都要 $129,加上有五個大男人,當然叫夠一隻。湯底是清雞湯,主角是古月龍山花雕酒;由於有酒,所以加入了紅棗、黨參,去除寒氣。雖然送上來的湯底是凍冰冰的,但已經聞到濃烈花雕香味,估計花雕的比例不少,因為整個湯底都變成了花雕的淺啡色。將整隻斬件雞放入鍋內,衾蓋,等湯滾 ⋯⋯ 等待期間,有啲擔心酒味會唔會太過濃烈;而且只是九月中,天氣仍然算幾熱,這個時候食醉雞鍋會唔會太過補 ⋯⋯ 湯滾了,先食一舊雞肉,花雕雞湯已經滲入雞肉內,咬落去有陣陣酒香,肉質也夠嫰滑彈牙。雞肉唔可以滾得太耐,否則會變得粗鞋,所以第一件事就是要將所有雞肉食完才開始打邊爐。酒精隨着滾湯揮發了不少,剩下的湯底就只有淡淡酒香,沒有酒精的苦澀;剛才的擔心原來是多餘的。食港式火鍋,除非完全不鍾意食牛肉,否則此乃必定上榜的火鍋配料之一;所有火鍋店的餐牌內也必定有一欄專門推介各款牛肉,「大一」也沒有例外。今晚就揀了牛魔王拼盤(本地牛、牛胸爽、安格斯牛粒、牛脷)($399)。雖然望落去幾大碟,但每款牛肉只有十片八片,都算幾貴;不過話說回頭,十幾年前開始,打邊爐食牛肉就開始變得越嚟越貴,所講嘅並唔係什麼日本和牛,只是來自中國內地的活宰本地牛肉也絕不便宜,最靚嘅頂級牛頸脊就更加貴,甚至貴過安格斯牛肉。牛魔王拼盤內的本地牛形容得唔夠貼切,應該直接寫明本地手切肥牛,雖然唔知道係什麼部位,但雪花紋夠多、又分布均勻,稱得上極高質素的本地肥牛。切得厚薄剛剛好、不會太薄,肉質柔軟、又保留適當程度的咬口;肉味濃郁,甚至有少少牛脂味道,只不過本地牛肉的牛脂略羶,不太好食,幸好未至於太嚴重,牛肉味可以掩蓋這陣微羶。安格斯牛粒及牛脷同樣好食,只不過兩者的烚煮時間同樣很難控制。切成小方塊的牛肉粒不似得牛肉片只需焯十幾秒,反而需要烚較長時間,否則受熱不夠,牛肉粒的中心會殘留了生牛肉的煙韌;烚得太長時間又會引致肉質粗鞋。淥牛脷的情況及要求也差不多,太生會很韌、太熟會很乾硬。牛胸爽到底是什麼部位,一直唔係好清楚,只知道係近幾年港式火鍋新興的本地牛肉刁鑽部位,據講係黏附著牛肋骨的一塊筋膜,雖然望落去白雪雪,但同脂肪一點關係都沒有。所以,淥熟之後,只會皺成一團、並沒有完全溶化。食落口也絲毫沒有任何牛脂羶、甚至沒有什麼牛肉味,只是有一點爽脆。個人口味寧取其他正式的牛肉部位。五個大男人年紀都唔細,所以鍾情於傳統的火鍋材料,鮮打墨魚丸($109)及鮮打海蝦丸($109)就唔可以缺少了,什麼芝心丸、爆漿丸等等,實在比較難以給予信心,只不過估唔到每碟超過 $100 的丸竟然只有九粒。無論墨魚丸或海蝦丸的確夠大粒,食落去也夠彈牙爽口、但又唔會過分煙韌,足以證明沒有加入大量生粉漿。每粒丸亦充滿鮮味,墨魚丸在墨魚髎內有細細墨魚粒、海蝦丸在蝦髎內有細細粒蝦肉;雖然貴,但都算貴得有價值。自制四寶餃($79)一碟有四款口味,每款三隻,分别是鮮蝦雲吞、手製水餃、手製韮菜餃、潮汕魚皮餃,比較起手打丸類就抵食多了。由於有五個人,冇份食所謂潮汕魚皮餃,翻看所拍照片,似乎冇一款似魚皮餃,反而水餃做好似有六隻,是否廚房執料時候搞錯了?無論鮮蝦雲吞及手製水餃皆有相當不錯的質素,兩者餡料除了最基本的全蝦肉之外,也有大地魚碎的香味;水餃也有加入木耳及筍絲。味道不遜於坊間一些高質素的雲吞麵粉麵店。花樣油條($69)是一款近幾年出現的新興火鍋配料,用港式油炸鬼作為基礎,塗在表面的餡料各適其適;「大一」採用了墨魚膠,再在表面舖滿一層蟹籽。店員好似話要淥兩三分鐘,原來唔係好夠時間;薄薄的蝦膠確實熟透了,但是油炸鬼仍然偏硬,湯底鮮味尚未完全滲入。經過幾次驗證,最後認為需要放在湯內滾差不多5分鐘,才能達到軟腍適中。芝味響鈴($59)叫了兩碟,因為實在太好食。每個響鈴的腐皮原材料夠薄,但又有很多層,所以做出來的響鈴非常大個又厚身。響鈴實在非常鬆脆、每一層腐皮也實在非常薄,夾起來已跌落不少碎片。喜歡保持鬆脆的話,放入火鍋滾湯內只需要拖幾秒;喜歡盡吸火鍋湯水,就要烚夠十幾秒,咬落去就會表層軟腍味濃(因為盡吸了湯水)、中心內層依然保持一點香脆口感。只不過實在食不出、也看不見任何芝士粉。如果所講嘅「芝味」係指製造腐皮的豆漿溝入了芝士粉、或者捲響鈴的過程中加入芝士粉,那就有點失敗了。總體來看,這間火鍋店相當不錯,以材料質素加上位處尖沙咀,價錢收得貴一點也是可以理解的。 繼續閱讀
(以上食評乃用戶個人意見 , 並不代表OpenRice之觀點。)
等級4 2017-05-30
10979 瀏覽
大伙人食飯最好就係打邊爐~! 夠哂高興又可以食到多d 款式,今次黎呢間大一慶生,經理推介我地一定要試試雞煲翅鍋,話真材實料,慶生食豪d 絕對無問題啦! 另一個選了比較有特色嘅黑松露鍋。人未到齊已經急不及待叫左2個小食頂頂肚餓,椒鹽雜菇同椒鹽粟米,炸得非常鬆脆,粉夠薄,配炸蒜椒鹽,無得輸吧!雞翅鍋真係好足料,有好多翅,8個人都每人份到幾梳,仲有成隻雞同2大舊豬骨熬湯,湯底非常香濃鮮甜,經理無介紹錯。黑松露鍋嘅香味驚人,黑松露味撲鼻而來,加入雜菌,係比較少油膩感嘅選擇。又係未落料已經飲左半煲。芝士響鈴是即炸,非常香脆。黑松露芝心手打墨魚丸,夠哂彈牙,芝士仲可以拉芝添。雲吞王入面有1隻原隻巨型大蝦,好大粒。到左全速開動嘅階段,刺身拼盤上枱,有冰鎮鮑魚,牡丹蝦,三文魚,鯛魚,帶子,魚,北寄貝,用料新鮮,刺身配火鍋,一冷一熱嘅鮮味衝擊,真是絕配。牛魔王拼盤有和牛粒,牛舌,安格斯肥牛,本地手切肥牛,牛胸爽,份量十足,圖中一片片白色嘅係牛胸爽,係牛嘅橫隔膜,薄薄一片但非常香嘅牛脂味,微微爽滑口感,好特別,推介大家要試一試。追加一碟手切肥牛,肉質紋理分明,相當嫩滑,帶少少爽口,牛肉味濃,正。牛丸質素相當有驚喜,大大粒之餘,好彈牙,好juicy ,一路咬一路會滲d 肉汁出黎,非常正。豪食嘅代價是每位400蚊消費,但呢度湯底,配料,地點環境服務,都好滿意,係優質打邊爐之選。 繼續閱讀
(以上食評乃用戶個人意見 , 並不代表OpenRice之觀點。)
等級4 2017-05-29
5027 瀏覽
今晚老表團出動,一圍老表出嚟食野緊係要揾坐得舒服,傾到計又食得飽既地方,火鍋係不二之選~唔好以為火鍋只係普通涮下涮下牛肉食下丸就算,而家尖沙咀有好幾間既火鍋配料用料上盛,絕對唔係滾兩滾,求其放野落口食今晚8個人,叫左兩個湯底。第一個係金湯雞翅鍋 $369。一上鍋,濃郁既金華火腿,再加雞湯氣味,非常吸引,見到湯內已經有好多魚翅群邊。我已經急不及待要飲幾碗湯先,雞肉亦好嫩滑。第二鍋為唔食雞件既表姐而設,野菌黑松露湯鍋 $169。什菌充足,輕輕放牛肉焯兩焯,係痴到哂黑松露上肉到,呢個湯唔係求其落精油架左上黑豬雲吞王,𥚃面有爽口豬肉加大蝦,蝦係新鮮充整一隻,好彈牙待應提醒食右上牛筋九既時候要小心,入面佈滿湯汁,一如所料,咬落去啲汁差啲噴到隔離個個😂所以唔好咁熱食,會碌到條脷下面黑松露芝士丸,自己唔食芝士無試,但見佢地拉芝拉得好勁,好過癮本地黑毛豬,切得好薄,所以涮三四下已經見到佢變白色可以食,油脂分布均勻,不失豬味牛魔王拼盤 $399牛脷薄身爽口又juicy牛肉粒油脂味較重手切牛肉口感幾正最想講牛胸爽,係牛既橫隔膜,滾唔駛一分鐘就食得,睇落白色好油,食落有油味但唔會泌油,反而好爽脆,好得意黑松露帶子餃$129餡料脹卜卜,𥚃面有豐富豬肉,紅蘿蔔,荀,黑松露,仲有整粒小帶子絕對係誠意之作,吸到湯汁,口感爽脆又重松露味紫色既淮山我係第一次見,建議煮耐一啲,粉啲更加好食人多叫一份「殿」量版既刺身拼盤食下刺身都好鮮甜特別推介鮑魚刺身,佢地有用鮑魚特製既醬配住一齊食,濃郁又爽口我男朋友打邊爐係一定要係最後食個麵先叫完滿呢個係女王粉$39 係澄麵粉溝蝦餃皮而成,煮得越耐,粉條越透明,食落煙韌,而且非常飽肚呢排餐廳話做九折優惠,我地8個人食左3千3,除返4百蚊一個人。湯鍋同配料絕對值回票價,所有單品我地都好滿意,無一款覺得伏,有機會要再嚟食😋 繼續閱讀
(以上食評乃用戶個人意見 , 並不代表OpenRice之觀點。)
等級4 2017-04-25
7419 瀏覽
同女友响尖沙咀workout完,半夜近十一點肚仔餓搵嘢食,梗係第一時間上「開飯網」按圖索驥睇睇附近邊度有好嘢食啦。女友不論四季都鍾情打邊爐,好啦!今晚就哂妳!就搵打邊爐。掃一掃附近,竟然發現寶勒巷有一間「冇喊臉」嘅火鍋喎!一於上去試吓。行到樓下一望,哦原來就係舊時最大嗰間卡拉OK嗰棟大廈嘅2字樓。升降機上到去一睇,嘩!乜得我哋兩個人包場呀?一眼睇哂,立即意會到老闆似乎深諳香港人熱愛卡位嘅獨特文化,全場統統都係卡位嚟,而且係仿照高級韓式烤肉店嗰種高椅背寬敞卡位,向馬路嘅窗口位嘅窗臺仲有成呎咁闊嘅空間可以用嚟擺放隨身包袱,嘩一坐低已經覺得好舒服好正呀!藍色格調嘅餐紙與水杯,黑白分明嘅兩雙筷子,細節上之細緻就係值得矜貴。個人好鍾意呢種陶瓷質感嘅餐具,最重要嘅係佢冇水漬!出面好多扮高級嘅食肆,無論啲餐具用得幾靚,始終畀未抹乾淨嘅水漬出賣!但係呢度冇發生咁嘅事,好嘢!襯埋一set嘅茶壺與紙巾,掂!用竹筒裝嘅生蒜、乾蒜、辣椒乾、蔥花、辣椒豉油、沙嗲、芝麻等八味架。zoom近少少畀大家睇吓,肥仔奇則向來獨沽一味落生蒜。好嘞門面嘢講完,入正題,點菜!首先梗係揀個湯底啦!因為肥仔奇想試真啲食材嘅真味,所以故意點一個清淡啲嘅湯底。入面大概有五、六件豬肺,呷一口湯,比不上真正嘅老火杏汁豬肺湯,但真係勝在夠清淡。等水滾嘅時候想點個劍魚腩刺身食住先,點知冇貨。店員推介咗餐牌上冇嘅油甘魚畀我,好啦冇所謂,一於睇吓埋單收我幾錢囉!食落始終唔係日本餐廳嗰回事。但係望吓呢個ワサビ係真係即磨唔係粉溝水,之後用返佢嚟點其他食材係一樣咁惹味!皇帝菜好新鮮,清新、清爽、清甜!海蝦丸堅有海蝦味,墨魚丸堅有墨魚味,鯪魚球入面仲有清香嘅果皮,豬肉丸就好普通。珊瑚蚌勁新鮮勁有海鮮味,唔似出面有啲舖頭,為咗令啲食材擺多幾日而起勢落粉「嗱」到冇哂鮮味。攤出嚟就幾好睇,但係唔知係咪因為品種問題,呢種牛一灼就黑,而且咬落牛味唔算好濃、唔算好突出。夜晚九點半後全單65折。 繼續閱讀
(以上食評乃用戶個人意見 , 並不代表OpenRice之觀點。)
等級1 2018-02-22
5 瀏覽
生日一班朋友幫我興祝生日,更係要找間有品質打邊爐,係open rice 得到0 喊喊確實很難得就試試啦!雖然價格有點貴,但品質確實很好,坐得又舒適,當日一行七人結算係$3120。我們推薦以下幾樣係必食: 湯底我地叫左金湯腿翅窩 $369 ~ 新年快到更係要叫個翅食下啦!好多翅一窩4人每人分到一碗確實很好,湯又夠味,但飲到第3碗確實有d鹹。芝味響鈴 ~ 唔油唔漏, 夠脆身。魚下巴(係個人特別喜歡)~ 第一次只有下巴食,喜歡食魚頭朋友們一定要叫,好滑魚肉鮮嫩,無魚腥味。手製水餃 ~ 個個都脹卜卜,內有好多料,內蝦又大隻彈牙皮又薄,朋友一致好評,叫多碟呀。可惜有隻蚊滋飛下飛下影響了食慾,不過值得一去。 繼續閱讀
(以上食評乃用戶個人意見 , 並不代表OpenRice之觀點。)