宮崎日式燒肉店 (已結業)

本來諗住去旺角食放題，不過後尾睇到有間烤肉店，老公想試下新野，於是就去咗試。一聽到烤肉就諗起韓燒果d格局，次次未坐低就周身煙味，同埋d野硬係好似唔太乾淨咁，所以去之前都唔抱太大期望。不過呢次就唔同，一去到個場都幾大，走廊都好寬濶，同埋佢走高檔格局，起碼唔覺果種污煙瘴氣的感覺。坐低劃紙落order，唔駛自己出去搶，感覺好好多。烤肉有牛羊雞豬海鮮，未熟果陣又可以食住刺身壽司先，最啱我！佢地用網燒，唔駛落油，又唔易整燶喎，好過平時果d燒烤燶晒都未熟…d職員又會教你點樣燒、燒幾耐先最好，都幾細心吖！至於刺身果d都幾新鮮，最後仲有送一杯雪糕，有d喜出望外…不過飲品就只包一杯，唔夠盡慶囉。同埋可能我地二人枱關係，個烤爐响正中，枱邊其實無乜位放食物，有時夾生肉會好容易「揩」到d刺身，所以要小心d。不過整體都好滿意，加上之前book定位，就唔駛等。