1988 (已結業)

去觀塘搵朋友食lunch，朋友即刻好雀躍叫我去一間排隊嘅餐廳，仲叫我一定要早過12:30去到，講到過嚟觀塘唔食呢間就走寶，咁樣一定要早啲去攞位啦，去到12:15暫時滿左一半客，朋友真係冇老點我， 12:30全場滿座。坐低點咗泰式滷水無骨豬手飯，一上枱見到份量都唔少，試啖飯先，吸收左滷水汁，又香又甜嘅味道好滿足，再試吓豬手，無骨唔會食到好論盡，豬手炆到好腍同入味，豬皮簡直入口即溶！要提下杯泰式凍檸茶，唔使自己篤嘅檸檬茶，成杯入面都係一粒粒嘅檸檬果肉，唔好諗住會好酸，份量調校得啱啱好，平時飲泰式飲品好怕好鬼死甜，但係呢度冇呢個問題。朋友果然無介紹錯！下次又可以多個食嘢既選擇！