六合小廚 (已結業)

尖沙咀貴為遊客區，食肆雖然好多，但係價錢都唔平，尤其要搵港式抵食嘅食品，更加唔容易。呢間六合小廚係港式嘅茶餐廳，亦都主打海鮮同小菜，價錢公道，可能同佢係樓上鋪，唔使捱貴租有關啦。見佢哋餐牌上食物種類非常多，好似燒味、粉面、小菜、海鮮餐乜都有，今日我就決定叫個二人辣蟹餐試吓啦！見佢哋個Menu餸菜都唔少，有辣蟹、炒菜、霸王雞、明火湯兩碗、白飯兩碗、茶、小食。果然，最終係食到好飽好飽嘅。霸王雞絕對唔係例牌咁簡單，呢度起碼係半隻，值得一讚嘅係，我覺得隻雞非常好味，皆因雞肉非常非常嫩滑，係真係好嫩滑嗰隻，雞有雞味，而且唔肥，連皮都食得，送飯一流。另一樣送飯最佳拍檔就係欖菜肉碎四季豆，欖菜味非常非常香，而且份量好多，四季豆同肉碎又新鮮，我好少食欖菜，今晚有新嘗試了，原來味道都唔錯呢。到主菜啦，就係辣蟹。呢隻蟹都算好大隻，鋪滿晒成隻大碟，啖啖肉，蟹膏都唔少。呢隻蟹係用椒鹽嘅方法去炒，應該有先將隻蟹炸香，因為啲蟹殼脆到係可以食得。而且師傅手勢同鑊氣都好好，隻蟹非常好食，小小辣，好惹味。明火湯係雞湯，飲得出係冇味精，因為好清甜，裏面仲有一絲絲嘅雞肉。小食係花生，好有香港茶樓嘅特色。