花丸軒

營業中

休息中

蘇豪天橋底下真是一個美食天堂，間唔中真會睇漏眼！最近老公同我講，佢發現咗馬莎對面竟然有間好有傳統feel嘅日本拉麵店！平時我哋食開嗰啲拉麵店都係比較易搵、有分店嗰種，所以呢間咁隱世又充滿傳統風味嘅真係好難得！一入到店，環境已經好有日本拉麵店嘅氛圍！我哋拎住MENU睇，無意中發現原來呢間係日本大阪超人氣嘅拉麵店，首次嚟香港開店！佢哋嘅招牌係慢煮原條豬軟骨拉麵，老公一睇到即刻二話不說嗱嗱聲落單！因為我哋坐吧台位，仲可以即場睇師傅整麵嘅過程，氣氛正到爆！老公最鍾意係嗰條豬軟骨，肉質軟腍入口即化，完全唔黐牙！佢仲話碗麵入面嗰塊紫菜上嘅書法字寫得好優雅，睇得出店家有心！我呢，就貪新鮮，試咗佢哋嘅灸燒叉燒沾麵。湯底係魚介豚骨，另上嘅湯底真是一個驚喜，味道濃郁但唔會單調，沾麵嘅口感同叉燒嘅焦香搭得太完美！