肉骨皇 (已結業)

去完中央圖書館找資料做功課，餓到個肚咕咕聲，心入面已經出現大坑呢兩隻字。成日聽見人話大坑多好野食，今日一定要探過究竟。走入去大坑入面，確實見到好多好有特色的餐廳，走左入去一間叫肉骨皇的，想試D香口野刺激下味覺。叫左肉骨茶、大馬橋底豬手、宜保芽菜雞。先黎一個肉骨茶，其實侍應未放落黎之前已經聞到陣香味，侍應好細心放底醬料，教我地點食肉骨茶。飲落去係超級濃郁，雖然我唔知道個材料係啲咩，但係有好香的香料味同醬油味，入面除左有好好食的豬骨外（豬骨煲林哂，好入味！仲有豆卜、杞子、最特別係有金菇，另外仲有一小碟油炸鬼。個湯係唔油既，好香，呢個必叫。再黎一個大馬橋底豬手。雖然咸豬手係名菜但我其實好怕食好咸的豬手，同埋好肥的部份。但係呢個大馬橋底豬手一啲都唔咸，肉質仲好嫩，一啲都唔鞋，佢層皮應該係炸過，因為好爽脆同埋係唔會感覺好油膩，食落去個感覺就好似食剛出爐的燒肉皮咁，兩個字，香脆。仲有係宜保芽菜雞，好靚的色澤，仲有配上三款醬料（大致係平時食海南雞果幾種）。食落去就一定知道係新鮮雞，因為雞肉係好新鮮，無論係雞肶肉同雞胸肉都好嫩滑，而且仲係已經起哂骨，啖啖都係雞肉。