花盃日本料理

營業中

休息中

食鐵板燒，好早已經聽過花盃這個名字，屹立在銅鑼灣多年，但就是一直沒有機會去幫襯。今次，終於的起心肝去睇吓。網上的食評，好壞參半，以呢個價錢，實在有唔同嘅選擇，但今次仍然選擇咗去一趟花盃，當是完成一個心願。訂位嘅時候，其實訂唔到鐵板位，我已經放棄咗。不過當日，有職員來電，告知有鐵板位，就當是緣份吧。服務員招呼我們一行三人，服務態度親切，閑談亦都適可而止，令人感覺舒服。本來我哋三個人都鍾意食龍蝦，所以想揀三個龍蝦餐，不過職員說因為一個餐有一隻龍蝦，如果我哋三個人都叫，可能會比較飽，同埋難以互相分享，佢提議我哋其中一個可以改鮑魚餐。聽左佢嘅意見之後，我哋改咗，亦都非常之滿意呢個選擇，可以多試一些菜式，又不會太飽。食鐵板燒，其實個廚師好緊要，我哋面前的廚師態度專業，亦都肯為我哋將唔同嘅食物互相分啲，他的烹調技巧亦十分專業，令人目不暇給。龍蝦、鮑魚極鮮甜，份量亦都好足夠，好滿足。牛肉我們選了美國的，已經好夠油分，加上師傅嘅功力，令人回味無窮。銀雪魚，師傅將皮拆開，分開煎，賣相同味道都非常吸引。帶子非常鮮甜，賣相精緻，連啲汁都飲埋。其他菜式亦都相當精彩。過了一個愉悅的晚上。