吉壽日本料理 (已結業)

旺角放題食市林立，要搵食唔難。如果想搵間地方夠大，食物款式多而又坐得舒服，可以試下位於旺角胡社生行5樓嘅吉壽日本料理。餐廳全層面積相當大，用A，B及C區劃分。座位咁多，六點半未夠，已經咁爆，證明質素有保證啦！步入餐廳，已有源源不絕補充嘅日式小食、沙律、湯類、清酒煮蜆、牛肉炒烏冬、水果、甜品同飲品等多種冷熱盤供應。坐低再打開「任點任食」嘅點餐紙，有海鮮宴、刺身、壽司、手卷、卷物、吉列、天婦羅及燒物等十多款美食。令人興奮雀躍之餘患上選擇困難症。開餐啦！點左多款食物雞翼燒到金黃色，內裡嘅牛油透入雞肉中，好芝味。而雞軟骨爽脆，有口感。炸鮮奶天婦羅、炸虎蝦天婦羅及炸香蕉全部酥脆。剛出爐嘅葡撻皮酥脆，啖啖滿口蛋香味。鹽燒鯖花魚，甘咸冇魚腥味。黃金焗帶子，原粒帶子充滿芝士味，彈牙有口感。蟹粥用上大大隻鮮蝦加半隻蟹做湯底煮成粥，鮮味綿密再加埋粟米粒，更加鮮甜有口感。花之戀用大大塊三文魚刺生加魚籽粒做成花狀，賣相相當吸引。三文魚同魚籽色澤鮮艷、三文魚嘅爽滑加上魚籽嘅卜卜脆、味道一流。燒鰻魚就肥美鮮甜。刺身拼盤一上檯，顏色搭配令人感覺勁開心。每件刺身非常新鮮，非常鮮甜。餐廳飲品種類繁多，同超市有得揮呀。💪