香港郵意明信片航海主題咖啡廳 (已搬遷) 新店位置

書展今日最後一日，梗係要去睇下有咩平，掃完平貨之後，想搵個地方舒舒服服休息下食個飯，朋友推薦呢間郵意明信片餐廳。餐廳環境都算舒適，睇過開飯網之前既食評，都知呢度好多野都係自己落手，由拎餐牌到回收餐具，都要自己搞掂。Jumbo All Day Breakfast :一向喜愛 all day breakfast 既我地，第一時間揀左呢個 jumbo 版，上檯時賣相吸引，迷你牛角包焗得夠香脆，黑松露炒蛋夠滑，可惜煙肉煎得比較乾，而只有粟米有加熱，茄汁豆仍然係凍既，呢方面可以改善。另一樣叫左 carbonara，醬汁煮得好味，但份量較細，而配料亦唔太足夠，食完都好似唔係好夠喉咁。食飽飽梗係要叫返杯咖啡休息下，我叫左 Hazelnut Latte，拉花相當靚，好香榛子味，飲落亦都相當香滑。朋友叫左 Orange Mocha，味道比較特別，咖啡味之中夾有淡淡既橙香味，都算係第一次試。呢度食物味道算唔錯，係服務較為一般，不過如果想悠悠閒閒咁坐下傾下計，都算係一個唔錯既選擇。