餐廳係18樓，入去第一眼就留意到落地大玻璃，夜幕低垂望唔清窗外景色，但依然見到璀燦燈光，高樓底加上落地玻璃令空間感覺更開揚。
裝修擺設以簡潔的深色調為主，有情調但唔會過於昏暗。
餐牌選擇未算好多，不過頗精緻，一早睇定食評，冇咩考慮就點好。
沙津份量幾大，夠兩個人Share。
北海道帶子好厚肉，鮮甜軟滑。黑醋係成個沙津點精之處，減輕羽衣甘藍自帶的微微苦澀味同時令沙律味道更豐富，好開胃。
貝殼粉 一入口已經覺得有驚喜！醬汁Creamy但唔油膩，貝殼粉彈牙，加上黑松露提香同雜菌增加口感，好味！
今次又同「牛魔王」食飯所以點左紐西蘭鮮肉眼，5成熟的肉眼帶淡淡嘅粉紅，中間部位稍為過生但可以接受。
牛扒肉汁豐盈，冇過多調味所以突顯到牛肉本身嘅香。牛肉汁味道帶甜，同牛肉味道幾夾。
真心要讚一讚配菜，大家都將Focus放係牛扒嘅時候餐廳完全冇忽略配菜，蕃茄仔烤完後唔只好甜仲爆汁；栗米仔都細心烹調過，帶蒜香；紅薯同蕃薯一入口竟然帶微微薑汁味，好驚喜！
呢度其中一樣主打甜品，幾乎每台都會點，望Menu每款都好靚，實物亦唔遜色。Ruby Peach外形似個桃，食落都充滿清新嘅桃香，中間嘅流心效果好靚，亦唔會過甜。用作裝飾嘅花同「泥」一樣食得，但就唔太岩我口味啦！
總體黎講係一個睇得又食得嘅甜品！ 我同朋友都唔太飲得酒，所以點左水果茶同梳打，味道唔算突出，好在水果係新鮮亦冇香精味。 今晚傾得盡情，亦食得滿足，由環境到食物質素都好滿意。開頭上菜較慢，但難得有舒服嘅環境又有時間傾下計，放低電話同工作好好放鬆下啦！
