韓舍 (已結業)

鼎鼎大名既韓燒放題店推出左全新既韓式宮廷海鮮鍋，鐘意韓式既我根本忍唔住於是就搵埋同事一齊黎食我地係7點左右黎到，果然係頂級既韓式食店，人客極多，好彩我地一早book左位，侍應好快就帶左我地埋位，招呼十分良好。坐低冇幾耐，店員就將一大盤既海鮮抬到我地面前，真係豪華到不得之了。侍應為我地既海鮮鍋加濃湯同埋開火既時候，隻龍蝦仲係非常生猛，好彩即刻冚蓋，唔係隻龍蝦一定飛出黎。係煮緊鮮鍋個陣我地拎左好多熟食黎醫肚，有糖醋排骨同埋豬手，排骨炸得岩岩好，醋既酸味唔會太搶，用黎開胃真係恰到好處。豬手更加唔洗講，非常之咁入味，豬皮入口即溶，好食到不行。係多種野飲提供之下我揀左最鐘意既蘋果綠茶。一開蓋個下海鮮既香氣轟炸式咁衝出黎，我同同事已經忍唔到夾完一舊又一舊，即使龍蝦仲係好熱我都堅持一下一下咁剝開隻龍蝦，黃黃既蝦膏非常吸引，我地好快就清晒滿滿既宮廷海鮮鍋。