八鍋堂．中日火鍋專門店 (已結業)

今晚同朋友仔行開旺角途經兆萬中心時，個肚突然好餓好想打邊爐，但朋友仔又偏偏想食刺生同天婦羅之類既日式食物。結果我哋就上咗三樓’八鍋堂’中日火鍋專門店，一次過滿足哂我吔兩個既欲望。女仔就梗係三心兩意，一般鴛鴦鍋又點可以滿足到我哋呢！’八鍋堂’竟然有個’四格鍋，可以任選四種不同湯底，無理由唔試喇！冬至排骨/蕃茄濃湯/ 皮蛋芫茜/中辣重慶麻辣湯, 真係味覺大刺激。食物種類適中，特選牛肉,牛小排同黑豚肉都係嚟自美國，有咬口同肉味。另外，還有多款海鮮火鍋配料可供選擇，生蠔/蟶子/象拔蚌就最鮮甜。近門口位置還有自助專區，蔬菜丸類豆製品等都可以隨意自取。而朋友仔就即時瘋狂亂叫了多款刺生、壽司、燒物同天婦羅，刺生/燒物/天婦羅都中規中矩，即叫即煮。壽司細細件，叫哂全部款式都唔驚太飽，最啱女仔同樣樣都想試嘅食客，咁就唔駛驚浪費。最後要提一提今晚個年青男侍應服務很好，不斷很快地幫我哋收走碗碟，值得一讚！