Wingman (已結業)

年幾前食過有唔錯既印象，今晚encore，揀左十隻口味雞翼放題，有得任飲汽水同檸茶。 唔想煩全晚叫左兩round，分別係頭五款同最後五款。蒙古燒烤味係好勁既孜然粉味，黑椒檸檬味就有少少辣，兩款都熱辣辣新鮮炸起好乾身，夠香口我幾鐘意。Honey Wasabi味就咁食已經幾正，加少少wasabi會冇咁膩，如果唔係另上而係每舊都用埋wasabi黎醃就好。黑芝麻海鮮蜂蜜味有好濃既海鮮醬味，甜甜地幾開胃，重口味人士必叫。泰式辣醬味不過不失，就係老麥泰式辣醬既味道，如果調味多少少層次會更佳。作為鐘意食辣既人，當然有叫水牛城雞翼同死神醬味雞翼。 前者同一般西餐既水準差唔多，死神醬味真心食左幾啖頂唔順，係好高濃度既tabasco味，諗清楚先好試。平時冇飲開咖啡覺得Bbq咖啡香味的確唔係我杯茶，因為灑左好多咖啡粉比較苦，反而幻想到用返蜜糖雞翼做底可能會幾夾。巴馬臣芝士蒜蓉味同田園風味係我地全晚最愛。 巴馬臣芝士蒜蓉味有重度芝士同蒜蓉，勁香冇理由唔好食。 田園風味就好奇妙地係品客薯片既sour & cream味，好得意。