呢間嘢有別於其他食店，其他食店都會有大大本餐牌放起檯度畀人睇，佢就無，見到海報宣傳嘅嘢唔多，於是用QR code掃下有乜嘢食，原來係比海報見到嘅多，左計右計，唔會蝕底下，叫咗下午茶餐咖喱三寶配飲品，$28，另外加豬腸蘿蔔竹昇麵，呢個組合既有我喜歡食嘅豬皮，又有我喜歡食嘅豬大腸，而且咁樣叫係最划算。
飲品冷熱同價，作為精明消費者嘅我當然係叫凍飲啦，所以叫咗杯凍檸茶，由於咖喱三寶同豬腸蘿蔔麵可以叫唔同嘅辣，於是我叫咗小咖喱辣同微麻辣。
味道方面，豬皮唔會太薄，爽口得嚟見唔到有豬毛，無豬毛呢樣嘢對我嚟講係非常重要。魚蛋係陳皮魚蛋，喜歡嘅話就覺得佢有陳皮味，唔鍾意佢嘅話係覺得質感偏實，睇你點睇。蘿蔔食得出係鮮甜味，而唔係加糖泡製，小咖喱對我嚟講係辣咗啲。
豬腸係用豬大腸嘅中段而唔係大腸頭，所以腸壁比大腸頭薄，而且有豬腸油，呢方面抵讚，但燜得過腍，無咗大腸嘅煙韌度，變得唔夠香，望落個樣唔似係急凍貨，應該係師傅問題，或者佢哋嘅品控要求要做到咁都唔定。
碗麵嘅質地唔係梘水麵，亦唔似麵舖嘅蛋麵，係另一種麵嘅特質，我唔識點形容，我自己就喜歡。個湯話係微麻辣，但我食唔到麻嘅感覺。
呢餐下午茶最正係杯凍檸茶，賣相絕對值100分，難得嘅係啲冰，居然用細粒嘅冰，雖然唔係刨冰，但質感有啲似刨冰，呢種冰嘅好處係快溶，唔會飲到最後都仲有幾嚿冰起度，再加埋甜度適中，檸檬亦飲到檸檬嘅鮮味，呢杯飲品，我夠膽講絕對贏咗99.9%嘅香港，甚至全世界嘅凍檸茶。
食飽之後，就行過附近嘅紅十字會，我都無幾年無成功捐血啦，唔係話血紅素唔夠，就係話做完手術後未過安全期，再唔係就話我驗血報告未出，唔捐得，呢次終於成功捐到啦！血紅素再唔係未到13，而係去到16，正！
由於捐血有年齡上限，過咗某個歲數就唔畀你捐，所以各位趁條件許可下，快快去捐血啦！善事唔伯做，莫因小善而不為，莫因小惡而為之。
1
2
