津味居 (已結業)

小弟從來偏好小鋪，由於客人同店員距離近，無論食物水準或服務都會落多點心機。而呢間小店由開張至今我同女友每星期都必定幫襯，服務殷勤，態度親切，無論老細定員工都好好傾好笑容。食物雖然非名牌大酒家般精緻，但係有無見過屋企食飯會挑隻紅蘿蔔、或放朶大菊花喺碟餸做擺設呢....呢度最出名嘅係水餃同涮羊肉，因為已經好多人提過所以唔再講，反而想講下佢地啲晚飯套餐。昨晚跟女友叫了個二人B餐，冷盤轉了烤麩，主菜係糖醋黄魚同炒椰菜。個烤麩係一早整定，但係非常入味，足可比美"上海老正X"，女友每次都指定要食。個糖醋黄魚細細條但係炸得好香，而啲肉重係好滑。雖然個汁係杰少少，但係送飯一流。至於個椰菜用咗少少煙肉炒，香口之餘依然清清地，跟濃味嘅黄魚非常匹配。跟餐甜品可以揀豆沙鍋餅或湯圓。埋單只係$128好抵。對比嗰啲集團式經營，提供樣板食品、樣板服務嘅食肆，呢度雖然菜式都只係大路貨色，但係製作嘅心機、再加上食物質素同親切嘅服務態度，正正就係我地呢啲無時間番屋企煮飯一族需要嘅嘢。