味帝漢堡 (已結業)

聽人講大⻆咀多左好多好既食店，今日專程過來行下睇下，果然有發現。見到店內呢個黑板風格既餐牌真係幾有feel，食物種類亦都好豐富，另外廚房係開放式，都幾乾淨，而食物係即叫即整，夠新鮮。睇完餐牌後叫左碎蛋芝士漢堡、碎蛋芝士煙肉漢堡、蘑菇奄列、羅宋湯同熱朱古力，2個人都夠食。今日天氣幾凍，飲熱既羅宋湯就岩哂，湯唔算太酸，而且夠濃郁，入面既配料入味得來都keep都少少口感，唔會話太軟綿綿。至於熱朱古力濃得來唔會過甜，而且有加入棉花糖，多一重口感。蘑菇奄列外層既蛋好嫩滑，再配上帶有微微甜味既醬汁和香草，內裡既菇鮮味濃郁，口感彈牙，整體配搭得很好，推薦。碎蛋芝士牛扒漢堡：牛肉熟度岩岩好，夠新鮮亦好有牛味，食落亦好多肉汁，加上碎蛋芝士和沙律醬，消除左漢堡本身油膩感，推薦。雙層碎蛋芝士煙肉牛扒漢堡：同普通牛排漢堡比起來份量更多，而內裡煙肉都保持到微脆口感，不過體積較大，口細既人要慢慢食。其實整體食物質素都高，價錢亦唔貴，同樣食物質素某些地區可以貴一倍，間唔中來大角咀搵下好野食都唔錯。