丼瀛 (已結業)

廟街云云煲仔飯之中，一間好吸引嘅丼瀛。之前網上見到好多人黎呢度打卡。而我係為左龍蝦刺身雙層丼慕名而黎。店面唔算好大，大概容納20人左右。一坐低，望到餐牌普遍食物定價都唔貴，重點發現9點半後壽司、刺身、沙律、小食都有半價優惠，勁吸引。每個飯餐都會跟一個麵豉湯。築地壽司杯 $168築地壽司杯一次過就可以試勻5個款式嘅迷你丼，用料實在，仲有一隻入晒味嘅磯煮鮑魚。魚子海膽壽司杯大推，海膽甘甜配魚子醬昇華高一個層次。香蔥吞拿魚他他都好正，甜蝦鮮味，值回票價。羽衣甘藍無花果果醋沙律 $78羽衣甘藍同新鮮無花果都係營養價值非常高同抗癌嘅食物。平時好怕羽衣甘藍粗糙略苦口感嘅我今次改觀，加試新鮮無花果非常清甜，兩者配上果醋高成沙律，味道真係唔錯。丼瀛龍蝦刺身雙層爆丼 $268期待已久嘅主角終於有得食喇。上層係龍蝦刺身雜錦魚生丼飯配埋溏心蛋，下層係蒟蒻沾麵配海膽芝士汁。就甘睇文字都夠晒邪惡。刺身滿滿，味道新鮮。龍蝦刺身調味後配飯勁滋味。下層沾麵嘅海膽芝士沾醬真係有海膽ga!沾麵用蒟蒻做，低卡爽口。海膽芝士汁芝味超濃郁，有陣陣淡淡海膽味飄出黎。沾醬令無味嘅沾麵掛汁後芝味無窮。整頓晚飯都幾驚喜，肚仔都大滿足。