新沙洞澡堂 (已結業)

約左朋友食韓國菜！黎到長沙灣呢間新沙洞澡堂試試。餐廳以澡堂為設計，有花灑、浴缸等打卡設計，好似去左旅行咁！我哋叫左部隊鍋套餐，好抵食，除咗有一個部隊鍋，牛角包窩夫同兩杯飲品！我哋揀左兩杯梳打特飲，賣相很好看，飲落清爽過癮。韓式牛肉部隊鍋有好多牛肉、午餐肉、茄汁焗豆、泡菜、辛辣麵等等，仲有一串年糕香腸串，好豐富！面頭仲有幾塊芝士，熱到半溶咁食好正！仲有隻雞蛋可以打落去食，兩個人食會好飽。而炸雞我哋點左柚子味，半份份量都多，雞肉炸到香脆香口，而且雞肉仲好嫩滑多汁，加上柚子醬甜甜蜜蜜咁，好好味，唔會好濟！我哋另外叫咗一份辣炒年糕。年糕煮得剛剛好，QQ彈彈有嚼口，而且辣到適中又掛汁，仲有一大串魚糕，食落好惹味！而甜品牛角包窩夫有好多款式，我哋揀左Tiramisu,果然無失望！Tiramisu忌廉好清型，仲有浸左咖啡嘅手指餅，充滿香濃咖啡味，好突出！牛角包口感亦好正，酥化有層次！可惜太飽，唯有下次再試埋其他口味！