回到味來 (已結業)

今晚同老婆去旺角行完街有點肚餓，去左旺角新城睇下有咩好食，見到三樓有間舖頭個名好特别叫“回到味來”，於是上去望望。上到去見到全場都是梳化卡位，可以坐得好舒服慢慢嘆。又見到門口個招牌寫住''用心為您 創做味來''，感覺可能會好好食，就入去試試幫襯下。一坐低侍應會送上餐廳送的小食“藕帶”，食落酸酸地辣辣地，好醒胃。我哋叫左個麻辣鷄煲(半隻$158)、鹽水鴨($52)、黃沙豬膶($58)、韮菜餃($38)、稻庭烏冬($28)。鹽水鴨肉汁鮮嫩，配上自家製帶有果香味的醋，味道好夾。鴨肉味咸咸地，再配上酸酸地又甜甜地的果香醋味道一流。個麻辣鷄煲有好多種材料，味道濃郁。鷄肉好嫩滑，連鷄皮都好好味，麻辣味香，調味夠濃，但不會太咸。食完煲裏面的鷄，加上熱湯就可以變成麻辣湯底火煱。韮菜餃餡料十足，皮薄餡靚，韮菜新鮮幼嫩，肉碎鮮味十足。黃沙豬潤份量十足，因為夠新鮮，只是點上少少豉油已經好好味。最後再食埋碗烏冬就非常滿足，彈牙的烏冬配上麻辣湯味道無得頂。😋😋總結，今晚食得非常滿意，下次會再幚襯。