焱丸水產 (已結業)

今日同朋友仔去銅鑼灣shopping，夜晚去左謝斐道附近揾野食，見到有間焱丸水產，好似唔錯，朋友仔就話入去試試。入面以日式佈置為主，地方唔算好大，但都有八成滿座。坐底後，我地問侍應有乜野磯燒推介～佢介紹我地食蟹味噌甲羅燒、海膽帆立貝燒。另外，我地叫左龍蝦鍋、吞拿魚鮫及青蘋果颱風乳酸。首先黎青蘋果颱風乳酸，乳酸上面佈滿冰凍青蘋果粒，好特別，味道好清新。之後再上吞拿魚鮫，之前三文魚鮫食得多，未試過食吞拿魚鮫，肉質鮮美，唔落檸檬汁都好好味。再上兩款磯燒，海膽帆立貝燒及蟹味噌甲羅燒，侍應好細心幫我地燒。海膽帆立貝裏面有一片牛油及有少量什菇，好好既配搭，朋友仔食到停唔到口，而我就欣賞蟹味噌甲羅燒，試左一啖，蟹羔入面配埋蟹子，口感好好，唔使加任何調味，都夠鮮味，正！我已約定朋友仔下次再黎食蟹味噌甲羅燒，真係好好味👍👍👍