一鍋豐 (已結業)

老豆鍾意打邊爐食海鮮食魚，做仔嘅有時間緊係要帶佢出嚟食下好嘢。 之前睇過一鍋豐嘅訪問，知道佢老闆對自己嘅好食材好有信心，呢度地點又係旺角創興廣場上面咁方便，一於黎試下先。老豆指定要食象拔蚌海鮮套餐，每位288蚊，任食兩個半小時，配料有過百款，非常精彩。 海鮮頭盤有象拔蚌，鮑魚，蟶子，珊瑚蚌，桂花蚌，蠔同海星斑片，好新鮮，老豆仲鐘意到一個人食哂啲斑片。不過我個人重口味就覺得啲豉油可以濃味啲，最好可以有埋芫荽！呢度仲有6款刺身任點，估佢唔到老豆連刺身都啱，仲大讚呢到啲三文魚刺身！呢度啲安格斯牛肉，牛柳粒都好正好香牛味。餃子好足料！野飲都算多選擇。食飽仲有雪糕雪條任食！