和牛燒肉一郎 (寶漢大廈) (已結業)

燒肉一郎雖然唔係開咗好耐，但好快就已經開咗幾間分店，今次襯放假嚟到銅鑼灣分店，叫咗A餐，雖然係最平嘅餐，但都已經好多嘢食！餐廳環境舒適，座位闊落，飲品選擇超多，除咗汽水外，都有果汁同水果花茶選擇，首先會先嚟套餐包嘅拼盤，用一隻木船裝住，其中肉類包括牛肋肉、牛里脊肉同雞肉，蔬菜則有南茄子同秀珍菇，仲有帶子同鮮蝦添～特別要推介呢個餐嘅牛肋肉，有牛味之餘一啲都唔韌，油脂好香，encore咗3次。仲有其他牛，包括牛外橫膈膜、牛肋條等。牛外橫膈膜唔係到到有，食落有咬口。食燒肉點可以無生菜！呢度嘅生菜都係任點。海鮮類都可以點海老，不過我哋果日就無～配菜有好多韓式小食，推介泡菜蘿蔔，夠開胃。明太子薯仔沙律，唔會好漏。溫泉蛋紫菜伴飯。3款自家製甜品，個人比較鍾意其他日本雪糕，特別係雪糕批個款，裡面包住綠茶味雪糕又唔會太甜。